Wy her Balthasar van der gnade Ghodes here to Werle bekennen vnde betughen an desseme breue vor al den gennen, de ene zeen, horen efte lesen, dat wy myt wolbedachtem m{uo}de vnde ghantzen vrygen willen, na rade vnses truwen rades beghiftighet vnde beleghen hebben, ieghenwardighen beghiftighen vnde belygen myt kraft desses breues de hochgheborne furstynnen vnde vrowen Heylewich, vrowe to Werle, des dorluchtighen fursten heren Gherdes wandaghes hertoghen to Slezewik deme Ghod gnedich zy dochtere, vnses heren Balthazars echlike wyff vnde leuen husfrowen, myt deme slote, stad, lande to der Lawen, manscop, tobehorynghe vnde aller rechtigheit, also id licht an syner schede, myt alle altes nicht {ve}ttonemende, id zy benomet edder nicht benomet.

Hyr vore hebbe wy vp ghebort ver dusent marc lubescher penninghe ghuder munte, also to Lubeke vnde to der Wysmer ghenghe vnde gheue synt van eres brutschattes weghene vnde hebben ze vort ghekeret an dyt sulue slot, stat vnde land to der Lawen to erer nuttigheit vnde vromen aldusdaner wis, weret dat vnser to kort worde, dat God affkere, so scolde vor Heylewich vnse h{uo}sfrowe vorbenomet brucliken bezitten vnde hebben to erue dyt vorbenomede slot, stad vnde land myt aller rechtigheit, also vore screuen is, sunder yengherleye hynder vnser eruen edder nakomelinghen beth so lange, dat eer efte eren eruen ver dusent lubesche marc, also vorscreuen is, to der n{uo}ghe vnde wol to dancke vterichtet vnde betalet zyn, vnde dar na scal slot, stad vnde land to der Lawe wedder komen to der herscop van Wenden vnde dor by blyuen, also id vor gheweset is.

Ok hebbe wy her Baltasar vorbenomet van vnsem eghen beraden m{uo}de vnde na rade vnser truwen ratgheueren, mannen vnde steden, der vorscreuen furstinnen vnde vrowen Heylewich, vnser leuen husvrowen, vorlaten vnde vorleghen, dar tho ieghenwardighen vorlaten vnde ligen myt kraft desses breues twe hundert lubesche marc gheldes iarliker rente, brucliken ze to hebbende to erem lifghedinghe, also lifghedinghes recht ys, vt vnde yn dessen dorpen yn der voghedye to Gustrowe, also to Wygendorpe vnde to K{uo}tze, to Tzarmersdorpe, to Krytskowe, to Grybbenisse.

Hir vore heft vor Heylewich, vnse husfrowe erghenomet, vorlaten myt guden willen dat richte bynnen vnser stad Parchym, dor wy ze tovoren mede beliftichteghet hadden, also de breue vtwyset, de wy er dor vp gheuen hebben; wen ouer wy edder vnse eruen {ee}r dat richte to Parchym quid vnde los wedder schikken, so scolen desse twe hundert marc gheldes wedder komen vnde blyuen, dor zee van rechte scolen.

Desse twe hundert marc gheldes scole wy vnde willen myt vnsen eruen er vntfrygen van allesweme, dat ze der iarliken bruken moge to erer beh{ue}ff, sunder hynder enes i{ee}sliken.

Weret ouer, dat God vorbede, dat ze an God storue, so scal dyt sulue ynghelt wedder komen vnde blyuen, dor id van rechte scal.

Ok hadde wy her Baltasar vorbenomet vor Heylewich yenghe andere breue vp lifghedingh ghegheuen vnde beseghelt, dor wille wy dessen yeghenwardighen breff vnghesereghet hebben, men willen zee to male yn macht beholden nach erem lude.

Were ok dat vor Heylewich, vnse leue husfrowe, edder ere eruen nicht gheddelik enwere to hebbende dyt vorscreuen slot, stad vnde land to der Lawen, so scolen {ee}r vnse eruen vnde nakomelinghe {ve}trichten to dancke vnde erer n{uo}ghe edder eren eruen betalen sos dusent marc lubescher penninghe, also yn vnsem lande to Wenden denne ghenghe vnde gheue syn, vnde dyt slot, stad vnde land to der Lawe scal wedderkomen vnde horen, den id van rechte scal.

Dyt is gesch{ee}n vor vnsem slote to Ghustrowe vor vnsem sittenden richte yn der ieghenwardigheit vnses truwen rades mannen vnde steden, also Hermen Krem{oe}n, Wuluingh van Oldenborch, Jachym Lynstowe vnde Hinrik Moltzan, de alle dyt recht vraghet, ordelt vnde delet hebben, vnses truwen rades to Parchym, Gustrowe, Plawe vnde Tetrowe, Malchyn vnde Warne vnde vele mer vnser manne vnde bedderuer lude, de tughes vnde louen wol werdich synt.

To hogher bewaringhe hebbe wy here Balthasar vorbenomet vnse ingheseghel myt witscop vnde willen henghet laten vor dessen breff, gheuen vnde screuen an vnsem slott to Gustrowe, na den iaren Ghodes verteyn hundert yar in deme souenteynden iare, dor na yn des hilghen cruces ouende also dat vunden w{ae}rt.