Wy Albert van Godes gnaden hertoge to Mekelenburg . graue to Zwerin to Rostoke vnde to Stargarde der lande here etcetera be kennen vnde be tughen openbare vor als weme dat wy vns hebben fruntliken gesatet vnde ge settet saten vnde setten myt craft desses breues to dem dorluchtigen hochgeborn furstenA vnde heren hern Erike to Sweden Dennemarken vnde to Norwegen der rike koning etcetera vnsem leuen oeme vnde to synen riken vorbenomed vnde synen nakomelingen jn sodaner wis dat wy teghen vnsem jrbenomeden oem koning Erik syne vorbenomeden rike vnde de synen nicht wesen vnde dun scolen noch wyllen yenegher leye wys vnde scolen em vnde synen vorbenomeden riken vnde den synen leue vnde fruntscop be wisen vnde wyllen wor wy konen vnde mogen mit vnsen landen vnde luden to ewighen tiiden . ♦

Dyt loue wy hertoch Albrecht jrbenomed koning Erike vorghenomed vnseme leuen oeme an guden truwen stede vnde vast to holdende sunder hulperede rechtgank vnde al arghe list vnde louen to vnser vorbenomeden oemes koning Erikes truwen hant al syner drier rike vorbenomed ge truwen rade ♦

Hir an vnde ouer hebben wesen vnse leuen getruwen . her Vlrik van Pentzen Gumpart Lutzawe . Wypert Lutzowe Jaspar Haluerstat . Hinrik Split Hans van Bulowe Hening Hoghe ♦

Des to tughe vnde to hogher be waringe hebbe wy hertoch Albrecht vorbenomed vnse jngesegel myt witscop myt vnser vorbenomeden leuen getruwen rades jngesegel to tuchgenisse henghen laten vor dessen breff ♦

Ghe geuen vnde screuen to Sleswik na Godes bort verteynhundert jar dar na an dem souenteynden jare des sundages na aller apostel daghe ♦