Universis, ad quos presentes littere nostre pervenerint.

Cum magistrum Nicolaum de Leis clericum Romanum, sacre penitentiarie scriptorem, nuntium et familiarem nostrum, ad nonnullas Alamanie Dacie Svecie et Norvegie ac alias mundi partes pro quibusdam nostris et ecclesie Romane negotiis presentialiter destinemus, ac volentes ipsum in eundo stando et redeundo plena securitate gaudere, universitatem vestram et vestrum singulos hortamur in domino, quatenus eundem Nicolaum cum sociis familiaribus equis valisiis rebus et omnibus bonis suis per nostra et vestra territoria civitates terras castra portus passus pontes et flumina ac loca quecunque et tam per mare quam per terram in eundo stando et redeundo, quotiens ipsum transire contigerit, transire stare ire et redire absque impedimento quocunque pro nostra et apostolice sedis reverentia libere permittatis, ipsumque benigne recipientes et gratitudine debita pertractantes nullam ei sociis et familiaribus suis in personis bonis et rebus hujusmodi inferatis molestiam aut aliam noxiam novitatem nec ab aliis, quantum in vobis fuerit, permittatis inferri, quin potius sibi et sociis de securo transitu scorta et receptu ac guidis, quotiens ab eo requiri contigerit, sic studeatis efficaciter et liberaliter providere, quod vestra exinde devotio apud nos et sedem ipsam possit non inmerito commendari, presentibus post sex menses a data presentium computandos minime valituris.

Datum Constantie non. dec. anno 1.