Wẏ radmanne vnde gantze menheit an L{uv}ndbergheheerde . bekennen vnde betughen openbare an dessen breue . dat wi vnsem gnedighen heren hertoghen Hinrike van Sleswijk greuen to Holsten etcetera huldighet vnde sworen hebben tr{ue}we vnde vnderdanich to wesende / alse vnsem rechten erffboren heren vnde willen em sch{ae}t vnde schulde gheuen . vnde jn allermathe horsam wesen alse wi sinen vor olderen dan hebben / vnde st{ae}n anders neneme heren huldinghe to . wen em . vnde sinen eruen . ♦

Des to tughe so is vnses heerdes jngheseghel henghet an dessen breff de gheuen is na Godes bord veerteynhundert jare dar na an dem achteynden jare des sondaghes vor lichtmissen ♦