Ericus, Dei gratia regnorum Daciae, Sweciae, Norwegiae, Slavorum Gothorumque rex et dux Pomeraniae.

Unsen gunstigen willen vorgescreven.

Erbaren borgermeistere und radlude!

Gi hebben wol vornomen, dat de Russen uns und unsen riken groten schaden gedaen hebben binnen veiligen, geloveden und gewissedem vrede.

Des is uns wol to irkennende gegeven, wo juwe medeborgere und koplude, de ere lande soken, de sulven Russen sterken mit spisinge und mit allerleie, des en bedarf is, dar se sik sere up dregen.

Worumme bidde wi mit aller vruntlicheit, dat gi in sodaner wiise vogen mit den juwen, dat de Russen sik nicht dregen up juwe hulpe und tosokinge, wente wi hopen mit der hulpe Godes en liik und recht af to manende, willen se sik dar sulven nicht ane richten.

Und bidden des juwe unvortogerde antwerde.

God almechtig beware ju.

Gegeven in unser stad Lyncoping, under unsem secrete, des XIVden dages in deme meyen.