Post salutacionem.

Ersamen guden vrunde.

Jw mach wol vordenken, wo wii an vortiiden umme zake willen, de wii jegen de Holstenheren hebben, jw mit vruntliken beden esscheden, dat gii etlike van jw hebben wolden mit vuller macht van juwer aller wegene to Sleswik uppe de tiid, alze wii unde unse ome dar latest vorgaddert weren; dat gii dat also helden und zanden dar, des wii jw vruntliken danken; und dar sulves mede en gedregen ward, dat wii und unse ome vorscreven jw stede van der hense bidden schulden, dat gii wesen wolden to Sleswik nu uppe den negesten to komenden sunte Johannis dach baptistenA, und helpen dar mede to, dat wii und unse ome vorscreven vorscheden worden, by deme to blivende, de der vorschedinge unde dem rechte vul deit; dar wii do beden de stede, dar to Sleswik vorgaddert, dat to bringende an jw, dat wii des van jw begerende sin, dat also to holdende, alzo vor screven ys.

Unde nach deme gii nu merkliken tosamende sint, so bidde wii jw vruntliken, datA gii alle tosamende komen uppe de vorscrevene tiid to Sleswiik, over unseme rechte to stande und unses rechtes mit unsen heren und vrunden mechtich to wesende, alzo gii annamed hebben, alzo dat wii mank jw veer stede utkesen mogen, de unse recht to sik nemen mit vuller macht; also ok, dat gii alle dar bii bliven, de dem rechte und vorschedinge vul deit, jegen den yennen, de dat recht und vorschedingeA nicht en holt.

Leven vrunde, dar do gii uns grote behegelicheit ane, de wii gerne wedder jw vorsculden.

Dar mede, guden ersamen vrunde, bevele wii jw Gode.

Scriptum inA castro nostro Werdingborch crastino beatorum Primi et Feliciani martirum nostro sub secreto 1418A.