Licet dudum quidam Johannes Kedingh presbiter et assertus rector parrochialis ecclesie in Lantkerken Ottoniensis diocesis ad instantiam Johannis de Scriban Romane curie procuratoris fiscalis fuerit excommunicationis sententia canonice innodatus et excommunicatus publice in partibus illis denuntiatus, tamen idem Johannes divinis officiis in contemptum clavium et vilipendium jurisdictionis ecclesiastice scienter se immiscuit missas et alia divina officia publice celebrando in anime sue periculum et scandalum plurimorum.

Et insuper, licet etiam dictus Johannes alias in Godfridum de Verden clericum dicte diocesis irruens eundem usque ad sanguinis effusionem vulneravit et in gladio, quem idem Gotfridus animo se defendendi evaginatum tenuit, indicem seu digitum primum post pollicem in sinistra manu idem Johannes sibi ipsi amputavit, ita quod inhabilis ad celebrandum missas factus extitit, nichilominus dictus Johannes missas publice contra sanxiones (!) canonicas cum defectu predicto celebravit, propter que dictus Johannes ad ecclesiam gubernandam reddiderat se indignum.

Quare supplicat Martinus Lemegow perpetuus vicarius ad altare s. crucis situm in parrochiali ecclesia oppidi Kylonensis Bremensis diocesis, quatenus alicui probo committere dignemini, ut se de premissis informet et, si repererit premissa fore vera, ipsum Johannem de dicta in Lantkerken ecclesia privet ipsamque, que de jure patronatus laicorum existit [fructus 15 mr.], prefato Martino de patronorum predictorum consensu conferat et provideat sibi de eadem.

Fiat et committatur. O.

Datum Mantue 5. id. dec. anno 2.