Cum ordo s. Augustini, s. Salvatoris nuncupatus, inspirante divina clementia ex ordinatione et institutione b. Birgitte tamquam nova in ecclesia dei in divinorum nominis et cultus uberius incrementum fructuosa plantatio salubriter sit institutus ipsique ordini et ipsius locis et monasteriis pia sancte sedis apostolice largitione diverse et presertim ad instar b. Petri apostoli ad vincula Urbis Romane alieque per diversos summos pontifices indulgentie sint concesse, quarum occasione monasteria et loca dicti ordinis ex devotione et piis populi christiani ad ea confluentis suffragiis plurimum reparata fuerunt, officiaque divina diurna pariter et noctur[n]a non sine laboribus et diligentia studiosius accreverunt, ut igitur tractu temporis ordo predictus in ipsius locis et monasteriis plus valeat augeri, ipseque populus christianus eo ferventius ad loca et monasteria predicta causa devotionis confluat, quo majorem suorum peccaminum remissionem et indulgentiam consequatur, supplicat Ericus Dacie Svecie et Norvegie rex, quatenus, omnes indulgentias predictas et inde secuta rata et grata habentes, ea ex certa scientia confirmare ... ac nichilominus revocationem et annullationem indulgentiarum ad instar alicujus indulgentie a tempore obitus olim Gregorii XI per quoscunque v. s. predecessores concessarum ad supradictas indulgentias non extendi dignemini declarare ....

[Fiat .. O.

Datum Mantue 12. kal. febr. anno 2.]