Omnibus presens scriptum cernentibus seu audientibus frater Galmundus prior fratrum predicatorum Nestwedis totusque conventus ibidem salutem in domino ♦

Notum facimus universis tam posteris quam modernis quod recognoscimus nos ex deliberato animo et unanimi consensu discreto viro latoripresencium Thrugoto Magni sutori civi Nestwedensi duas terras nostras cum edificio ipsis supraposito in curia quam Nicholaus Thome dudum possidebat Nestwedis situatas . quarum una in dicta curia australiter situata est . habens longitudinem vigintiquatuor ulnarum et latitudinem octo ulnarum cum dimidia / altera vero illarum terrarum situata est in eadem curia prope communem vicum qui ducit versus claustrum habens longitudinem vigintiduarum ulnarum extendentem se a parte australi ad partem septentrionalem necnon latitudinem octo ulnarum cum dimidia que latitudo se extendit a parte occidentali ad partem orientalem pro competenti precio nobis ab ipso pleniter exsoluto vendidisse et assignasse jure perpetuo possidendas unde obligamus nos et nostros successores sibi et suis heredibus dictas terras appropriare et ab impeticione quorumcumque liberare ♦

In cujus rei testimonium sigilla nostra presentibus sunt appensa ♦

Datum anno domini m^ocd^odecimonono dominica proxima ante festum pentecostes ♦