Ericus, Dei gracia Dacie, Swecie, Norwagie, Sclauorum Gotorumque rex et dux Pomeranie.

Wetet, leue oem van Holsten, alse vmme dessen vrede, den de stede twischen jw vnde vns gedeghedinget vnde secht hebben, bynnen deme suluen vrede ys vns vnde den vnsen vele vnwillen schen van jw vnde den juwen, alse an dotslaghe, an roue vnde lande vnde lude entweldighet vnde an mennigherleie ouerwalt vnde vnrechte, alse jw en deel wol witlik gedaen ys van vnser weghen, wat dat is, vnde wi noch wol witlik maken moghen, vnde hebbet rechtes darvmme begherende weset van jw, dar vns doch nen antworde van komen konde, dar wi ane vornemen konen, dat gij dar rechtes ouer helpen wilt.

Leue oem, wolde gij jw noch darto othmodighen vnde doen vnde helpen vns also vele, alse recht were van disses vorbenomeden vredes weghen vnde van anderen vredebrake, de in vortijden geschen ys vnde vmme des wi jw totoseggende hebben, vnde deden vns so vele, alse recht were, vnde nemen des gelijk wedder van vns, vft gij vns worvmme totoseggende hadden, des wi gherne ouerbodich willen wesen, dar bidde wi gherne vlitliken vmme, leue oem.

Dyt vorscreuen nemet to synne vmme Godes willen vnde dencket vppe mennighes armen mans vorderff, dotslagh, mord, roff vnde vele vnwillen, de daraff entstan mach, vft gij vns rechtes weygherden, alse wi doch hopen, dat gij jo nicht en doen, wente vnseme hern Gode schal dat bekant wesen, dat wi jw des vngherne weygheren willen, dar gij recht ane synt.

Leue oem, des gelijk doet vns wedder vmme de leue Godes vnde vmme mennighes vorderues willen, dat darvan entstande ys, alse vorscreuen steyt.

Scriptum Lunden, sabbato proximo ante dominicam passionis Domini, nostro sub secreto, anno etc. XX.