Wetet, leue oem, dat vns de van Lubeke enen dagh gescreuen hebben myt jw to holdende in vnser stad to Sleswik vppe der hilghen dreualdicheit sundagh nw neghest komende. Deme wille wy so gerne doen, alse se vns dat gescreuen hebben, vnde willen dar, vft God wil, suluen wesen edder de vnsen dar van vnser weghen hebben, de vnser to allem rechte vulmechtich wesen scholen.

Hijrvmme bidde wij jw, leue oem, vmme Godes vnde ere willen vnde vmme angheborner maghschop willen, de wi to hope hebben, vnde seet an de werke der barmeherticheit vnde keret aff mennighes armen cristen mynschen schaden vnde vorderff vnde blotghetent, dat van vnseme vnwillen vnde krighe entstan magh, des in vortijden leider, dat dem alleweldighen Gode geclaghet sy, to vele geschen ys, vnde pleghet van vns ere vnde rechtes vmme des wy jw totoseggende hebben, vnde nemet des gelijk wedder van vns, vnde latet dat in vruntschop tuschen jw vnde vns komen, also dat wi jw vruntschop, leue vnde willen myt reddelicheit bewisen moghen vnde gij vns wedder, des gij vorwar wol louen moghen, dat vnse gantze meninge is van grund vnses herten, dat id darto komen mochte twischen jw vnde vns, dat wi jw mochten myt reddelicheit willen bewisen, vnde nemet tovoren dat loen van Gode darvore vnde alle der vnsen willen vnde vruntschop deste vurder.

Scriptum feria quinta ante dominicam Misericordia Domini.