Minen willigen horsam to allen tiden.

Erwerdige leve her meister.

Juwer erwerdicheit begere ik to wetene, dat an dage gifte dusses breves van warhaftigen und getruwen luden unses ordens mi to wetene is geworden, wo de konink van Dennemarken alle sin dre koningrike to hope vorbodet heft, und let alle de schepe in allen sinen haven rosteren, und heft in dem Sunde alrede schepe gerosteret, also dat dar nimande en kan dorch gekomen, und heft all sin volk up dussen negesten tokomenden Pinxsten to samende vorbodet, bi namen de ut Osterlande sollen tosamende wesen to Calmarn up de vorgescrevene tit, und de anderen in den Orssund, und nimand en wet, wo he hen denket.

En dels seggen, he wil up de Holsten, en dels seggen he wil up den bischop von Camyn, und en dels seggen, he wil vor Revale, und nimand kan de warheit darvan weten.

Hir umme, erwerdige leve her meister, also verne als idA ju duchte geraden wesen, dat dat hus tor Narwe vorwaret werde, und dat grote hus to Reval, dat men hir up dem groten slate to Revale eine malve lede over dussen somer, dat id vorwaret worde, wante de daem w{uv}st is, also dat dar so tor wis nein dreplik volk is uppe, und doch grote macht is dor ane.

Dat lutteke hus wil ik laten dach und nacht vorwaren, des besten dat ik kan und mach, und weret, leve her meister, dat gi hir vif efte VI denere kunden schicken, de wolde ik gerne holden, wente ik der hir nicht kan bekomen.

Ok so sint de Dutschen gesellen, de hir to jare int land quemen, rede to segelende, de ik gerne hedde beholden.

Vortmer, erwerdige leve her meister, kunde gi enen getruwen bussenschutten hebben, dat gi den hir to Revale wolden senden, und wes juwe wille were, dat ik eme geven solde, dat wolde ik gerne don, wente ik nimande hir en kan gehaben.

Sunderges en wet ik ju up dusse tiit neine tidinge to scrivende.

Got almechtich juwe gesuntheit to langen tiiden beware.

Gegeven to Revale, an dem dage inventionis sanctae crucis, im XIV^c und XX jare.

Cumptur to Revale.