Meister Dutsches ordins to Lyfflande.

Unsen fruntlichen grut mit ganzer gunst altiid tovorn.

Erwirdigen vorsichtigen bisundern frunde und leven getruwen.

Als daling ist unse nige herre bischopp to Revale bi uns gewesen, in jegenwerdicheit unses landtmarschalkes, des cumpthurs to Dünemunde, des vogedes to Wenden und der cumpthure Aschraden und tor Mytow, und gaf uns tor kennende, wo dat Henricus van der Beke und somelike andere Romesche impetranten, de domkerke to Revale anleggen und moien mit eren impetratien, dar mede se de kerken und ere lene, de doch in sich sulven swak sint und sulker unkoste und moie, de dar up lopen mosten in sulken saken, nicht gedregen en konden, als gi dat sulven mogen dirkennen, vornichtigen und vorderflik maken.

Hirumme so bidde wi ju, leven vrunde und getruwen, dat gi juwe kindere und frunde dar to holden und also underwisen, dat se sulke ungewönlicheit aflaten, wente de kerke van Revale in eren gesetten und wonheiden van anbeginne gestichtet is van einem ertskoninge, unsem gnedigen koninge to Denemarken und sinen vorfaren, dat ok ein ertzbischof van Lunne, in des provincien de kerke to Revale licht, heft bestediget, und in unser und unser vorvaren beschermunge bit her to heft gewest, dar inne wi se ok vortan to eremA rechten allewege willen holden, dat Henricus van der Beke und andere juwe frunde sulker anfechtunge, als he vorgenomen heft, der sulven kerken nicht forder anleggen, darumme se in vornichtunge ofte vordern schaden durfe komen, went anders de lene und provende der vorgedachten kerken vor armeden und vornichtiget würden, dat wi gerne keren und beschermen wolden helpen, war wi solden und mochten.

Gegeven to Rige, am nesten sunavende vor Vocem iucunditatis, anno etcetera XX^mo.