Den ersamen borgermesteren unde radmannen der stad to Lubike, unsen guden vrundes, kome unse breff.

Hinricus Dei gracia dux Sleswicensis, comes Holtzacie, Stormarie etc.

Unse vrundlike gunst tovoren.

Wyllet weten, borgermestere radmanne ghuden vrundes, alzo wy juw nů latest toscreven under mer worden, dat wy juwes trostes unde hulpe beghereden jeghen den konnigh unde dat de konnigh noch lege vor Vemeren: des wetet, dat he nů Vemeren wunnen heft; unde wy hebben dar nů warliik ruchte van van enkeden boden, de uns ghekomen sind, dat he nů ind erste wil teen vor de Nygenstad.

Hir umme bidde wy juw noch denstliken unde otmodighen mit gantzem vlite, dat gi uns nů willen to hulpe komen mit alle juwer macht, wente gi uns jo secht hebben, dat wy scholden vrede hebben wente to sunte Michelis dagheA, dat uns nů van dem konninghe ovel geholden werd.

Hir umme dut wol umme Godes willen, unde dencket in dat grote unrecht, dat uns armen heren schud, wente wy vormoden uns, dat gi uns jo secht hebben, we vrede holden wolde, dem wolde gi bihulplik unde bistendich wesen.

Ok bidde wy juw, leven vrundes, dat gi uns nů ind erste willen senden soshundert weraftich in to der Nigenstad unde teyn bussen unde twe tunnen krudes unde alzo vele stene unde redschopes, alzo to den bussen horet.

Leven vrundes. Biwyset juw nu hir ane, alzo wy uns alles guden to juw vorseen; dat wil wy gerne jeghen juw vordenen mit lande unde mit luden na alle unser vormoghe, wes wy juwer guden menninghe hir an neten.

Boven des scrivet uns juwe unvortogerde antwerd.