Martinus etc. dilecto filio Johanni electo Asloensi salutem etc.

Cum nos pridem ecclesia Asloensi pastoris regimine destituta de persona tua nobis et fratribus nostris ob tuorum exigenciam meritorum accepta de fratrum eorumdem consilio auctoritate apostolica duxerimus providendum preficiendo te illi in episcopum et pastorem prout in nostris inde confectis litteris plenius continetur nos ad ea que ad tue commoditatis augmentum cedere valeant favorabiliter intendentes tuis supplicacionibus inclinati tibi ut a quovis malueris catholico antistite graciam et communionem apostolice sedis habente ascitis et in hoc sibi assistentibus duobus vel tribus aliis catholicis episcopis similem graciam et communionem apostolice sedis habentibus munus consecracionis recipere valeas ac eidem antistiti ut munus predictum auctoritate nostra libere impendere tibi possit, plenam et liberam concedimus tenore presencium facultatem.

Volumus autem quod idem antistes qui tibi prefatum munus impenderit a te nostro et Romane ecclesie nomine fidelitatis debite solitum recipiat juramentum juxta formam quam sub bulla nostra mittimus interclusam ac formam juramenti quod te prestare contigerit nobis de verbo ad verbum per tuas patentes litteras tuo sigillo signatas per proprium nuncium quantocius destinare procuret quodque per hoc venerabili fratri nostro archiepiscopo Nidrosiensi cui prefata ecclesia metropolitico jure subesse dinoscatur nullum imposterum prejudicium generetur ..

Datum Florencie sexto decimo kal. augusti anno tercio.