Vnse vruntlike grote myt alles gudes begherynghe tovoren.

Ersamen leuen vrunde.

Wy hebben wol vornomen an den breuen, de gi vnsen vrundes, den van Rostke vnde van der Wysmer, ghesand hebben, vnde ok alse der Wysmerschen sendeboden to den zuluen vnsen vrunden, den van Rostke, wøruen, dar se eren scriuer to vns vmme ghesand hebben, wo gi beghereden, dat wy ok vnses radessendeboden myt den iuwen to dem hertoghen van Sleswik senden wolden, vnde vnses sendeboden tøuen wolden, de wy to dem heren konynghe senden wolden, alse langhe dat me en antworde hadde van den Holsten heren etcetera.

Des wetet, leuen zunderghen vrunde, dat wy vmme des dotslagesA willen Degheners Bucgenhaghen leyder Gode gheclaget nicht konen vnses radessendeboden to den Holsten heren myt den juwen vnde myt den van der Wysmer senden, dat wy bidden vor nenen vnwillen to nemende, men de anderen vnses radessendeboden wille wy gherne alse langhe tøgheren, beth vns van iw tidynghe weddervaret, dat gi by den Holsten heren hebben gheweset.

Vnde bidden iw, leuen ersamen vrunde, dat gij vmme des menen besten willen enkede voruaren vnde iw laten to wetende don van den heren van Holsten, oft ze rechtes vmme des willen, dat se seggen, dat de konyngh den stekedach nicht gheholden heft vnde he darvmme sin recht schal vorloren hebben, willen bliuen by heren vnde by steden vnde ok erer houetsake.

Weret dat de koning zin recht dar nicht mede vorloren hebbe edder oft ze rechtes, alse vorscreuen is, by heren vnde steden nicht bliuen willen, dat gi dat yo enkede van en voruaren, dat me vor den heren koning moghe bringhen, vnde dat gi denne daran myt juwen rade vurder spreken, oft ze rechtes nicht wolden van zik gan, dat me denne by dem heren konynge, de dat beste recht hadde vnde rechtes by heren vnde steden wolde bliuen, bleue, dat vns nutte dunket, dat men by deme bleue, de dat recht nichten vløghe, vnde senden iuwe radessendeboden to dem konynge, wente wy vns yo vorsecht hebben, by deme rechte to blyuende, vnde moten yo de lenghe by dem bliuen vnde enen wech slan, vppe dat de copman vrede moge hebben, welke boden gi also vulmechtigh senden, alse wy de vnsen don, dat se nyn weddertoch nemen, alse by dem konynge to bliuende, oft de Holsten heren dat recht affwerpen, vppe dat dar nene langhe togherynghe van kome.

Wat iuwe guddunckent hirvmme is, bidde wy vns en antworde darvan to scriuende.

Scriptum dominica post ad vincula Petri.

Consules Stralessundenses.