Omnibus presens scriptum cernentibus Johannes dei gratia episcopus Roskildensis salutem in domino ♦

Constare volumus presentibus et futuris nos ex consilio et consensu dilecti capituli nostri Roskildensis sanctimonialibus claustri sancte Agnetis Roskildis omnes decimas nostras episcopales de Ramsyø magle et Ramsyø gardh et Ramsyø lillæ in parochia Gardzstrop decimis canonicalibus de bonis canonicorum in dicta parochia Gardzstrop dumtaxat exceptis jure perpetuo possidendas scotasse et ad manus libere assignasse ♦

Pro quibus bonis predictarum sanctimonialium in Siærstrop pronunc desolatis in parochia Bistrop in Sæmæheret situatis cum omnibus et singulis eorundem bonorum pertinenciis videlicet agris pratis pascuis silvis piscaturis humidis et siccis nullis penitus exceptis quibuscumque censeantur nominibus nobis ac successoribus in recompensam scotatis et reassignatis jure perpetuo possidendis ♦

Insuper obligamus nos et successores nostros ad appropriandum et disbrigandum prenominatis sanctimonialibus claustri sancte Agnetis Roskildis et earum successoribus predictas decimas episcopales de Ramsyø magle Ramsyø gardh et Ramsyø lillæ ab impeticione quorumcumque et hujusmodi permutacionem sic ut premittitur factam irrevocabiliter observare ♦

In cujus permutacionis testimonium sigillum nostrum una cum sigillo dilecti capituli nostri predicti presentibus est appensum ♦

Datum anno domini m^o cd^oxx^o primo profesto sancti Kanuti regis et martiris ♦