Unsern garfruntlichin grus zuvor und alle gute.

Ersamer lieber her gebitiger!

Wir haben mit den forsten, heren und gesten, die unlanges von uns sein gescheiden, uns aller unser cleinot so ganz emplost, das wir slechts nichts ansichtiges behalden haben. Nu wellen wir uns gerne danksam beweisen an unserm gnedigen heren koninge zu DenemarkenA vor sinen hering, und uns sine gnade beheglicher machen, mit etwas goben, der wir Got weis jo nicht selber haben.

Umb deswillen mussen wir bekommern, wie note das wirs thun, euwir gute, die wir bitten, als wir getrulichste mogen, gerucht uns, lieber her gebitiger, zu steure kommen mit eim cleinot, is sei an heilgethum adir welcherlei das were, das sonst ansichtig und erentreich ist, und sendet uns das bei dem gebitiger, den ir zu uns werdet usrichten.

Nicht zwivelt an uns: hilft uns der gutige Got, das wir ummer kreftiger werden, wir wellens euch unzwivelichin wol irgetzen und vorguten.

Gegeben zu Rastenburg, am sontage Laetare, im XIIII^c und XXIII^ten jore.