In deme namen der heilgen Dryualdikeit amen. Czu ewigem gedechtnisse diszer nochgeschreben stucke, czu eren deme allerdurchluchtsten forsten vnd grosmechtigsten hern, hern Romisschen koninge, zcu wirdikeit der gemeynen heilgen cristenheit, zcu frede allir rechtfertigen luwte, zcu eyntracht vnd zcu ewigen bestanden der reiche Dennemarken, Sweden, Norwegen vnd der herzcogthume vnd lande als Aldestettyn, Pomern, Wolgast vnd des forstenthumes zcu Rugen vnd des Deutschen ordens zcu Pruwszen vnd Lifflant, iren landen vnd luwten, so bekennen in diszem kegenwertigen briffe wir Erich, von Gotis gnaden der reiche Dennemarken, Sweden, Norwegen, der Wenden vnd Go{e}tte koning vnd herzcog zcu Pomern, vnd wir Otto vnd Kaszmir, brudere, von denselben gnaden herzcogen zcu Stettyn, Wartslaff vnd Barnyn, ouch brudere vnd herzcogen zcu Stettyn vnd forsten zcu Rugen, vnd Bogusslaff, herzcog zcu Pomern, vor vns, vnsire erben adir nochkomelinge der reiche vnd herzcogthum vorgeschreben, vnsire vndirsasen vnd ynwoner derselben reiche, herzcogthumen vnd landen, die nu seyn vnd zcukomende werden, an der eynen seyten, vnd wir bruder Paul von Rusdorff, homeister, vnd Sifridt Lantdere, gebitger in Lifflant, Deutsches ordens, vor vns, vnsirn orden lant vnd luwte, die nu seyn vnd zcukomende werden, an der andern seyten, das wir alle vorbenumpt vns von beiden teylen mit enander in ganczer eyntracht vff eyne fruntliche, truwe, stete, vaste vnd ewige zcusasze vormittelst crafft vnd geczugnisse diszes kegenwertigen briffes vorbunden haben vnd vorbynden zcu ewigen czeiten in sotaner weise, als hir nochfolget vnd ussgedruckt stehet, sunder allen vorfank, die vns an beiden teilen in diszem kegenwertigem vorbunde fruntlicher zcusasze mochte zcu schaden adir zcu hynder komen an eyngerleye weise. ♦

Zcum irsten mole, gefyle is sich alzo zcu etlicher zceit, das eyngerleye forste, herre, ritther, knecht, lant, stete, luwte adir gemeyne ymandis von vns beiden seyten vorgeschreben noch diszer zceit vorweldigen, vorvnrechten, beschedigen adir wedirstall thun wolden adir teten, so sullen wir koning vnd herzcoge ebenumpt vnd vnsire erben vnd nochkomelinge, ap die gewalt, vnrecht, schade adir wedirstall geschege an vns, vnsirn erben adir nochkomelingen, reichen, landen adir luwten vorgeschreben, das vorkundigen vnd wissentlichen thun vormittelst vnsirn erlichen sendeboten adir briffen deme erwirdigen heren homeister ebenumpt adir seynen nochkomelingen. Weres ouch alzo, das die vorgeschrebene gewalt, vnrecht, schade adir wedirstall geschege adir gekart wurde an vns homeister vnd orden <land> adir luwten, so sullen wir das vorkundigen vnd wissentlich thun vormittelst vnsirn enckenden sendeboten adir briffen deme herren koninge vnd den herren herzcogen ebenumpt adir eren erben adir nochkomelingen; doch also das disze vorschrebene heisschunge vnd vorkundigunge stahe alleyne vff deme deme herren koninge, vff eyner seyten, vnd des gleichs vff den heren homeister des ordens vorbenumpt, vff die andir seyte. ♦

Man weres also, das die vorbenumpte herre koning apgynge, das Got vorbitte, vnd do nymandis von den Stetynisschen herren noch im koning wurde, so sal die vorbenumpte heysschunge vnd vorkundigunge haben die eldeste herre von den Stetynschen herren, die denne ist. So sullen wir koning Erich vnd herzcogen ebenumpte vnd vnsire erben adir nochkomelinge vff vnsire eygene kost, als das hirnoch clerlicher vssgedruckt stehet, deme herren homeister vnd orden ebenumpt, wenn sie vns die vorgeschrebene hulffe ansynnen werden, vnd wir homeister vnd orden desselben gleichen deme durchluchtsten forsten vnd herren demme koninge vnd herzcogen vnd iren erben adir nochkomelingen, ap sie vns hulffe ansynnen werden, bynnen dreen monden dor noch schicken eyne zcall von folke, als zcwetuwsent weerhafftige mit harnasch vnd czur were wol vnd czemelich ussgericht zcu pherde adir zcu fusse, als die hulffe denne geheisschen wirt. Were abir das eyngerleye seyte von dissen vorgeschrebenen vff diszer seyten der sehe obiruallen wurde mit ynzcoge von ymandis boben recht, so sal die andir seite der seiten, der der obiruall geschiet, von stunt stad an zcu hulffe komen noch irem vormogen, noch deme als is denne gelegen ist, so fru sie dorczu geheisschet wirt. Vnd die so snelle heisschunge mag eyn iclicher herre in diszem vorbunde thun, deme des denne not ist, doch also, geschiet die heisschunge der vorgeschrebenen hulffe zcu diszer vorgeschrebenen lande behuff vff diszer seiten der sehe, das die hulffe denne zcu pherde adir zcu fusse geschee, als is denne geheisschet wirt; weres ouch, das die heisschunge der hulffe zcu der vorgeschrebener dreyer reiche behuff geschege, so sal die hulffe zcu schiffe vnd zcu fusse gescheen. Is en were denne also, das die yene, deme die hulffe gescheen sulde, eyne mynnere summe von folke heisschende wurde, das wurde bey im stehen. Weres ouch also das die anstehende sache adir not, dor die hulffe zcu dynen sulde, sotane were, das dar eyner grosseren czall zcu behuff were, so sal die yene von vns an beiden seiten, die die vorgeschrebene hulffe adir dinst heysschende wirt, das denne vorkundigen vnd vorschreiben der andirn seiten, vnd so sollen wir von beiden seiten vnuorzogert dor uff zcu hoffe schicken zcu eyner gelegelichen stat vnd eynem ussgestiktem tage vnsire erliche sendeboten vss vnsirm rathe vmbe zcu ramende vnd eyns zcu werdende mit enander eyner grosseren zcall von folke noch gelegenheit der anstaenden sache adir not vorgeschreben, vnd noch derselben gelegenheit, sache vnd not sal denne der eyne deme andirn von vns von beiden seyten vorgeschreben forder beystendig vnd behulfflich wesen noch vormogen, sunder arg, als man denne prufen kan, das des ebenumpten dinstes adir hulffe dorczu behuff wirt; sunder is were denne so, das der eyne von vns an beiden seyten vorgeschreben, der zcu der uorgeschrebenen hulffe geheisschet wurde, des yenen adir der yenen, dar die vorgeschreben dinst adir hulffe vffgehen sulde, zcu eren vnd czu rechte mechtig were; vnd derselbe von vns an beiden seyten vorgeschreben der sich eynes andirn noch der vor geschreben weisze mechtigen wirt, der sal denselben vndirhorig machen deme rechten bynnen sechs monden dor noch, als her zcu derselben hulffe geheisschen wirt adir her dyne zcu der hulffe, als vor gerurt ist. ♦

Vnd yodoch in was weisze die vorgeschrebene gewalt, vnrecht, schade, widerstal adir anfal geschege, die vnsir eynigem an beiden seiten anlegen wurde, so sullen vnd wellen wir doch an beiden seyten vns beweisen vndir enandir mit ganczen truwen, doch alzo das die eyne seyte die der andirn folgen wirt mit zcweentuwsent weerhafftigen adir dar beneden adir boben, der sal sich selben speisen bis das sie in des andirn lant, hauene adir gebitte kompt, vnd dornoch sal sie uortan speisen deryene, deme die hulffe gethan wirt, so lange her sie zcu seyner hulffe haben wil, vnd sie denne vort vndir seynen kosten zcu lande schicken. ♦

Vnd gefyle is sich alzo, das ymandis von vns an beiden seiten vorgeschreben, der sich vormittelst der vorgeschreben hulffe adir dinste an ymande richtende wurde, vnd dorobir becrefftet lant, stete, slosse adir luwte, den fromen sal deryene behalden, deme die vorgeschrebene hulffe adir dinst gethan wirt vnd des sullen ouch die gefangenen bleiben, doch das man das uorteyl gebe den, die sie greyffen; sundir andire stucke als roub vnd andire reyssige habe, die sal man buwten noch kriges vnd orloyes weise. Vortmeher ap is also gefyle, das ymandes von vns an beiden seiten vorgeschreben mit ymande vmbe des andirn willen zcu vnwillen adir zcu krige qweme, so sal doch eyne seyte sich nicht apsuwnen ane des andirn willen, vnd ap in deme vorbenumpten dinste adir hulffe ymandes an beiden seiten vorgeschreben schaden neme, den sal ikliche seite selbir tragen. Vortmehe sullen alle ynwonere vnd vndirsaszen der reiche vnd lande vorgeschreben vnd alle des koningis vnd der herzcogen ebenumpt, ere erben adir nochkomelinge vnd der cronen vnd der lande dynere in des vorbenumpten herren homeisters vnd des ordens lande, hauenen vnd gebitte zcu lande vnd zcu wassere, vnd do wedir uss vor vns homeister vnd orden vorgeschreben vnd die vnsirn vnd alle die, die vmbe vnsirn willen thun vnd lasen wellen vnd sullen, mit iren leyben vnd guttern geleitet vnd uelich wesen vor alle gewalt vnd vnrecht; vnd des gleichen sullen ouch geleitet vnd geuelichet wesen alle ynwoner vnd vndirsaszen des ebenumpten herren homeisters vnd ordens vnd alle irer vnd irer lande dynere in den reichen vnd landen vorgeschreben; doch alzo, das eyn iclicher von vns an beiden seyten zcu der stat, do her adir seyn gut zcukomen wirt, thu des her von rechtis wegen plichtig ist zcu thunde noch koninglicher freyheit, als den reychen gebort vnd in koninglichen rechten vnd freyheiten nichts zcu obirgeben vnd in deme gleich alle den vorbenumpten herren eynem iclichen in seyner herschafft vnd lande. Weres ouch das ymandis eyngerley vorbot tete, die lant in der eynen seyten vorgeschreben nicht zcu suchende, so sal die andere seite den yenen ire lant ouch vorbitten nicht zcu suchen. Vnd ouch das wir alle vorgeschrebene vnd eyn iclicher bey sich an beiden seyten wesen vnsirs rechtis vnuorsumet, ap wir irkeyene zcusache adir recht vnder enandir hetten adir noch haben wurden, vnd yo vnsir eyner deme andirn in fruntlichkeit rechtis zcu phlegende, ap vnsir eyner sich ichts beclagete adir beclagen wurde wedir den andirn. ♦

Werys ouch sache, das ymandis in der vorgeschrebenen masze schulde vnd ansproche zcum andirn hette edir krege, so sal man botschafft vss, vnsirn reethen von beiden seyten bynnen deme ersten halben jare dornoch, als die ansproche vnd schulde gethan ist, zcu houffe senden, vmbe dieselbige schuldigunge mit fruntschafft apzculegen. Weres das das nicht gescheen konde, so sal dieyene, den man anclaget genczlichen rechts phlegen bynnen deme neesten jare dornoch. ♦

Alle disze vorgeschreeben artikel vnd eynen iclichen bey sich glouben wir Erich, koning vnd herzcog vorbenumpt, vnd wir Otto, Kaszimir, Wartslaff, Barnyn vnd Boguslaff, zcu Stettyn vnd Pomern herzcogen vorgeschreben, noch rathe vnd volbort vnsir rethe nochgeschreeben vor vns, vnsire erben vnd nochkomelinge, vor vnsire reyche, lande, luwte vnd vndirsasen vorgescreben bey vnsirn koninglichen worten vnd forstlichen truwen, vff der eynen, vnd wir bruder Paul von Rusdorff, homeister, vnd Sifride Lantdere von Spanheym, gebitger in Lifflant, Deutsches ordens, noch rathe vnd vulbort vnsir gebitger nochgescreben, vor vns, vnsire nochkomelinge, vnsirs ordens gebitger, lant, luwte vnd vndirsasen, bey luwtern gutten truwen, vff die andere seyte, stete, veste, genczlichen vnd vnuorseerlichen mit gesampter hant vnder enander ane eingerleye argelist getruwlichen zcu halden zcu ewigen czeiten. Des zcu grosser sicherheit vnd crefftiger beuestigunge haben wir koning Erich vnd Otto, Kaszimir, Wartslaff, Barnyn vnd Bogusslaff, herzcoge vorgeschreben, vnd wir bruder Paul von Rusdorff, homeister, vnd Sifride Lantdere, gebitger in Lyfflant, Deutsches ordens, als die vornemisschen houptheren disses vorbundes vnd zcusasze, vnsire ingesegele mitsampt der erwirdigen in Gote vatere, strengen vnd woltochtigen, alzo bisschoff Jonsson, erczbischoff zcu Vpsal, bisschoff Jons, bisschoff zcu Zelant, her Allegut Magnuszon, her Erich Crummendik, her Axel Petersson, her Henrich Canutesson, her Benedictus Poggewisch vnd her Jons Grym, rittere vnd rethe, von vnsir vorgenanten koning Erichs, <vnd> vnsir reiche wegen; hern Andreas, abt zcu Colbas, Symon von Guntersberge, Hanns von Wedele zcu Crampsow vnd Peter Wossow, rethe, <von> vnsir vorgenanten heerren, hern Otton, hern Kasimirs, herzcogen zcu Stettyn, von vnsir vnd vnsir lande wegen; her Ludeke Cornyn, pharrer zcu Wolgast, her Roloff Nuwenkirche, her Henning von Josimunde vnd Henneke Beren, rethe, von vnsirs vorschrebenen herzcoge Wartslaffs vnd herczoge Barnyn, von vnsir vnd vnsir lande wegen; her Mykz von Czytbenitcze, her Matczke Borke, rittere, Wilke Mandufel vnd Henrich von der Goltste, rethe, von vnsir vorgeschreben herzcog Bugesslaff etc., von vnsir vnd vnsir lande wegen, vnsir reiche vnd lande rethe, von vnsirm teile, vnd ouch mit Walraben von Hunsbach, groskompthur, Lodwigs von Lanszen, obirsten marschalls, Nyclos Yorlitcz, obirsten trappiers vnd zcu Cristburg kompthurs, Jost Strupergers, treszlers, Merten Kempnathers, zcu Thorun, Jost Hoenkirchers, zcum Tuchel, Lupolt Reytenbach, zcu Slochow kompthur, Walther Kirskorp, voith der Nuwenmark, Deutsches ordens, rethe, von deme andirn teyle, als teydingsluwte vnd geczuwge, ingesegelen haben mit rechter wissenheit alle eyntrechtichlichen lasen anhangen diszem briffe, der gegeben ist zcu Nuwen Stettyn noch Gotis gebort vierczeenhundirt im dryvndczwenczigsten jare am achten tage nativiatis Marie, der achtbaren juncfrawen.