Episcopo Arusiensi.

Cupientibus vitam ducere (regularem apostolicum debet adesse presidium, ut eorum pium propositum possint ad laudem divini nominis adimplere).

Cum itaque Haquinus Friis presbiter Roskildensis cupiat unacum conventu monasterii in Westerwich ordinis s. Augustini Burglanensis diocesis sub regulari habitu virtutum domino famulari, nos .. fraternitati tue mandamus, quatenus eundem Haquinum, si alias sit idoneus et aliud canonicum non obsistat, auctoritate nostra in prefato monasterio, si in eo certus sit canonicorum numerus, et aliquis de hujusmodi numero desit ad presens, extunc, alioquin, quamprimum defuerit, vel si in monasterio ipso dictus numerus non existat, dummodo per hoc hujusmodi monasterium nimium non gravetur, recipias in canonicum et in fratrem sibique juxta ipsius monasterii consuetudinem regularem habitum exhiberi ac de communibus ejusdem monasterii proventibus sicuti uni ex aliis canonicis integre provideri ipsumque ibidem sincera in domino caritate tractari <facias>A, et nichilominus regularem professionem per canonicos monasterii predicti emitti consuetam ab ipso Haquino, si eam in tuis manibus emittere voluerit, auctoritate nostra recipias.

Datum Rome apud ss. Apostolos 6. kal. junii anno 7.