Wy Herman Butenschone vnde Richard Lancghe. Bekennen in dessem breyue, dat de eersamen heren, her Hinrich Rapesulver, her Johann Maeck, her Symon van Øerden, her Johan Vreese, vmme vnser bede willen hebben verborghet van vnseme ghenedigen heren, deme konninghe, van ere stede wegen van dem gude, dat in schipper Clawes Nielope gebleuen was, XXVI ipersche, XLIX thomasche, X kumesche, VII popersche, II hele popersche slachdoke vnde II halue popersche slachdoke vor XIIƗ^c mark lubesch, so beschedeliken, wanner de stede bi vnses heren genade werden komende to dem daghe, de verramet is vpp Pinxsten neghest to komende, vnde de domer van Gotlande daer bi komen mid eren priuilegien, vnde de stede mit eren priuilegien, weret denne sake dat vnszes herren genade vns de XIIƗ^c marck affspreke vnde se van den vorscreuenen heren gheeschet worden, des wy nicht en hopen, so loue wy Herman vnde Richard vorbenomed van vnser stede weghen, den eersamen heren vorscreuen daer gued voer to wesen, vnde willen se daervan schadeloes holden.

Tor tuechnisse vnde to merer vorwaringe so hebben wy Herman Butenschone vnde Richard Lancge vorscreven vnse ingezegle an dissen breyff gehancgen, de gegheuen vnde geschreuen is in deme jare vns Heren XIIII^c vnde XXV, an sente Marien Magdalenen auende.