Vnsen vrundlikenA grut vnde wes wij gudes vormogen touorn.

Ersamen leuen vrunde.

Juwe breue, vnder uelen worden ynneholdende, wo dat gij grot arbeid gedan hebben vmme de dutschen, de tho Nougarden gevangen sin, dat doch, Gode entfarmen mote, nicht gehulpen en heft, hebbe wij wol vornomen, vnde is vns van gantzeme herten leed, dat de copman alzo vnschuldiges teghen God, recht vnde redelicheit vorwaldet wert.

Vnde wij willen, zo wij ersten moghen, bestellen, dat bij deme heren konninge van Denemarken bearbeidet werde, dat sine gnade dar wat gudes to do, dat de vorscreuen copman moghe vry werden, sine koninglikeA gnade mede biddende, dat ze dar mede v{oe}re wezen wille vnde nicht enstede, dat nenerleie gud up de Russen gevoret en werde vte sinen riken, de wileA ze den vorscreuen copman tegen God, recht vnde redelicheid zo yamerliken vorwalden.

Ok, leuen vrunde, hebbe wij den steden in Prutzen vnde dem copmanne to Brugge in Vlanderen alrede vorscreuen, dat ze, dar yd in erer macht is, nicht ensteden, dat yenich gud uppe de Russen gevoret en werde, dar mede ze gesterket werden.

Ok wille wij deme heren homester van Prutzen dar gerne vmme scriuen an der besten wise, dat wij moghen van der gemeynen stede weghen.

Vnde wes wij don moghen, dat dem vorscreuen copman to Naugarden vnde dem gemeynen copmanne van der D{ue}tschen Henze to troste, n{ue}tte vnde vromen komen mach, dar wille wij vns ane bewisen myt gantzen tr{ue}wen nach alle vnseme vormoghen.

Ok, leuen vrunde, vppe dat gij kennen m{oe}ghen, dat vns des copmans van der Dudschen Henze vorderf hertliken leed is, vnde dat wij vnsen vlijt dar to don vnde dar up warden laten, eftmen ienich gud ankomen konde, dat bynnen vorbodenen reyzen gekoft were, so hebbe wij hijr dree gesellen, de vte den rijken des uorscreuen heren koninges myt eren copenscoppen in de N{we} vnde vort to Nawerden sochten, myt den Russen dar to copslagende, angripen vnde in de vengnisse setten laten, vnde sodane <gude, alse> wasA vnde werk, alse ze ute Ruslande here bracht hebben, arresteren laten uppe tokumpst der stede, wan de sik hijr vorgadderende werden.

Vorder, leuen vrunde, alse gij van Revele vns vnder meer worden scriuen, wo vaste schepe iuwe stad vor bij gesegelt sin in de N{we} vnde in de Narwe vte Pr{ue}tzen etc., mach iw wol vordencken, dat wij iuw an vor tijden screuen, dat gij dar up vorzeen vnde sorchuoldich weren, dat gi sodane schepe, alze iuw vorbij vndeA in de Nw segelen wolden, t{oe}ueden myt l{ue}den vnde gude dar ynne wezende bette uppe recht vor de stede. Vnde lichte wanne gij deme alzo gedan hadden, alset jw wol ghevoghet hadde, dat scholde zere n{ue}tte sin gewesen vor de stede vnde den copman van der Dudeschen Henze, de sik der handelingge bergen.

Ok hadde vns wol nutte geducht, dat gij Hanze van deme Werdere vnde Hanze Reppen myt ereme gude get{oe}uet hadden, ghelijk alze wij den gedan hebben, de wij mit vns hebben get{oe}uet, alse uor screuen is.

Vnde na deme gij nu der erbenomeden Hanze vnde Hanze nicht getouet en hebben myt eremeA gude, alze gij vns doch gescreuen vnde gebeden hebben, dat wij yd in allen wech, dar vns des nod duncket sin, vorscriuen wolden, dat sodane dingh vorwaret worde, so m{oe}te wij dat vor den steden vorl{ue}den laten, dat gij dar suluen enteghen gedan hebben.

Vnde bouen alle begere wij noch, yft schepe tegen der stede ordinantienA jw vorby in de Nw segelen wolden, dat gij den och t{oe}uen myt luden vnde gude uppe recht bette uor de stede.

Vnde holdet de zake an dwangge vnde strenggelicheit, zo gij vterlikest konen vnde moghen, wente scholde wij id hijr yn dwangge holden vnde gij scholden dar dor de vingere to zeen vnde des nicht rechtuerdigen, dat d{ue}chte vns vngelijk vnde des gemeynen copmannes vorderf zijn, dar gij yo, alse wij h{oe}pen, vore willen wesen vormiddest hulpe der stede Rige vnde Darpte.

Sijt Gode beuolen.

Screuen vnder vnseme secrete, des sonauendes vor Suntte Dyonisij, anno etc. XXV^o.

Consules Lubecenses.