Wismariensibus, Rostockcensibus et Stralessundensibus.

Vnsen vrundliken grot mit wunsche alles guden touoren.

Ersamen leuen vrunde.

Id schach kortliken, dat wij dre gesellen, de Nouwerden tegen der stede ordinancien, also de reyse heft gesloten wesen, mit gude, dar se de Russen mede sterkeden, versocht hadden, in vnser stad mit gude, alse wasse vnde werke, dat se van den Russen wedder koft hadden, beslagen hebben, vnde hebben de suluen gesellen in vnse slote setten vnde dat gud arresteren vnde vorwaren laten.

Vnde wente nu de irluchtigeste vorste vnde grotmechtige here, here Eric, koning to Denemarken etc., vns vor de suluen gesellen gescreuen heft na lude eyner auescrift siner herlicheid breuesN hirane besloten, so mene wy, sinen gnaden, so verne id iuwer wisheit behaged, van vnser aller wegen dar wedder vp to scriuende na lude eynes ramesN hir ok ane besloten.

Vnde wes iuwe meninge vnde willen hirane to donde is, begere wij vns vnvortogerd to scriuende bi dessen boden.

Vnde bouen alle dunked vns nutte vnde noed sin, datmen desse zake in dwange vnde strengicheit holde, so men vterlikest kan vnde mach.

Sijt Gode beuolen.

Screuen vnder vnsem secret, vppe Sunte Calixti dage.