Wij borgermestere vnde radmanne der stede Lubeke, Hamborch, Rozstok, Stralessund, Wismer vnde Luneborch bekennen vnde betughen openbare in desseme breue vor allesweme, dat wij to dem krighe, den wij myt dem heren koninghe van Denemarken etcetera vnde synen helperen voren vnde holden moten, van stund an vtverdighen scholen vnde willen to der Osterzee ward, alse wij van Lubeke, Hamborch vnde Stralessund, eyne jewelike stad viffhundert werafftighe, de van Rozstoke, Wismer vnde Luneborch malk drehundert werafftighe.

Vnde worde des ok nod, dat wij to somere erst to komende den vorscreuenen krich vurder holden mosten, so schole wij, eyne jewelike der erbenomeden stede de vorgerorden were dubbelt maken vnde de to rechten tijden rede vnde verdich hebben, alse wij des eyndreghende werden.

Vnde desses to merer tuchnisse hebbe wij erbenomeden stede vnse ingesegele hengen heten vor dessen breff.

Datum anno Domini MCCCCXXVI^o, ipso die Mauricii et suorum sociorum martirum.