Wetet jrluchtigeste hochgeborne furste vnd here her Erick der rijke Dennemarken Sweden Norwegen der Wende vnd der Gotten konig vnd hertoge to Pomeren / dat wij borgermestere ratmanne ghemende vnd jnwonere der stad Luneborg vnd vnse helpere de wij dar to theen konen . wo men de benomen mach / j{ue}we juwer rijke lande vndersaten jnwonere vnd helpere . wo men de ok benomen mach . vyende willen wesen / vmme mannigerleye vele gewald vnrecht schaden vnde gebreke willen / Alse vns vnsen borgeren / vnde deme gemenen Copmanne van jw juwen vndersaten vnde den juwen gescheen is / teghen vnse priuilegia vnd fryheide / de vns van juwen vorfaren ghegeuen vnde besegelt / vnd van jw confirmeret vnde bestediget sin / vnd juwe besegelde geleyde / vns vnde den vnsen / van jw vnd den juwen / nicht geholden is / ♦

Des wij vnd de vnse vnuorwinliken groten schaden vnd hinder genomen vnd geleden hebben vnd willen des vnse ere an jw allen vorgescreuen wol vorwaret hebben . ♦

Desses to merer witlicheit hebbe wij vnser stad jngesegel gedrucket heten neddene vppe dessen breff . de gescreuen vnd gheuen is na Christi gebord verteynhundert vnd in deme sessevnde twintigesten jare . des negesten sondages na sunte Remigius daghe des hilghen bisscoppes.