Wetet . jrluchtegheste . hochgheborne vorste . vnde here . her Eryk der ryke Denemarken . . Sweden . Norweghen . der Wende vnde der Gothen konyngh . vnde hertoghe to Pomeren . dat wy . borghermestere . radmanne . ghemeende vnde jnwonere der stad Stralessunde . vnde vnse helpere . de wy . dar tho theen konen . wo men de benomen mach . juwe . juwer . ryke . lande . vndersaten . jnwonere . vnde helpere . women de ok benomen mach . vyende willen wesen / vmme mennegherleye vele ghewalt . vnrecht . schaden . vnde ghebreke willen . alse vns vnsen borgeren vnde deme ghem{ee}nen copmanne . van iw . iuwen vndersaten . vnde den juwen gescheen is tieghen . vnse priuilegia . vnde vryheide . de vns van juwen vorvaren ghegheuen vnde besegheld . vnde van iw confirmeret . vnde bestedeghet sint . vnde iuwe beseghelde gheleyde . vns vnde den vnsen van iw vnde den juwen nicht gheholden en is . des wi vnde de vnse vnvorwynneliken groten schaden . vnde hinder ghenomen . vnde gheleden hebben . vnde willen des vns to den eren an iw allen voreghescreuen wol . vorwaret hebben . ♦

Desses to merer witlicheit hebbe wy . vnser stad secret ghedrucket heten . neddene vppe dessen breff . de ghescreuen vnde ghegheuen is . na Cristi ghebord veerteynhundert vnde in deme sos vnde twinteghesten iare . des neghesten daghes . na sunte Calixti daghe des hilgen paweses ♦