Vnsen fruntliken grut mit begeringe alles guden touoren.

Gerwin, besunder gude vrunt.

Wy begeren ju weten, dat wy dem copmanne to Brugge vnde ok dem copmanne in Engelant vorscriuen van wegen der houetlude, alse Peter Johanssen, Johan Bertramesson, Michel Ruten vnde Bartholomeus V{oe}te, so dat se bearbeiden willen laten dorch ere merkliken bodesscopp in Engeland by den suluen houetluden, dar mede se mit erer zeltschopp, schepen vnde were by de stede vnde vns komen mochten, alse gi dat in vnseme breueA, den wy dem copmanne vorscriuen, clarliker wol vernemende werden etcetera.

Begere wy vnde bidden ju fruntliken, dat gi der stede vnde vnser bestes by deme vorscreuen kopmanne vortsetten willen vormiddelst juwer guden anwisinge, so dat de copmanne ere hemelken bodesscopp darvmme sunder vertreck do by dem copmanne in Engeland, de zaken mit den vorscreuen houetluden vnde erer zeltschopp vorder to handelende, also dat se to der stede vnde vnsem denste vnde hulpe komen, wente gy suluen wol erkennen, wen se by den heren koning qwemen, dat dat den steden vnde deme gemenen copmanne to vervange vnde to schaden were.

Vns willen hirinne to bewisende, versculde wi vmme juwe leuen alle tyt gerne, wor wy moghen.

Syt Gode beuolen.

Schreuen etcetera.