Wetet jrluchtide hochgeborne ffurste her Erik der rike Dennemarke Sweden Norwegen der Wende vnde Gotten konningh vnde hertoge to Pomeren [dat wy] borgermester rad vnde borgere gemeynliken vnde inwonere der stad Embeke mit [vnsen hulperen] willen juwe juwer rike vnde juwerA rike vndersaten vnde inwoneren wo men de benomen mach vygende wesen vmme der ersamen heren vnde vnser vrunde der rede vnde borgere der stede willen Lubeke Hamborch Rostock Stralessunt Luneborch vnde Wismar etcetera vnde dar vmme dat gy den kopman der dudeschen hense dar we mede tohoren swarliken beschediget vnde vorvnrechtet hebben vnde de juwe beschedigen vnde vor vnrechtigen laten in juwen riken vnde beden tegen priuilegia vnde wonheyde de van juwen vorvaren gegeuen vnde besegeld vnde van iv suluen gestediget sin ♦

Vnde we willen des alle vnde vnser eyn jowelk bysunderen mit vnsen hulperen vnse ere an gik vnde den juwen to guden tijden wol vorward hebben ♦

Des to bekantnisse is vnser stad jngesegel to ruggehalue gedruckt vppe dussen breff ♦

Gegeuen na der bord Cristi verteynhundert jar dar na in dem se{uv}en vnde twintigesten jare des myddewekens na Oculi mei in der vasten ♦