Wetet / jrluchtede hocheborene furste her Erik der ryke Denemarken Sweden Norwegen der Wende vnde der Gothen kunninghe vnde hertoghe thu Pomeren dat / we radmanne vnde jnningesmestere . burgere gemeynliken vnde jnwonre . der aldenstad Magdeborch med vnsen hulperen willen juwe / juwer ryke vnde juwerer ryke vndirsaten vnde jnw{oe}nerer / wu men de benomen mach fygende wesen / vmme der ersammen . heren vnde vnser frunde der rede vnde burgere / der stede willen / Lübeke / Hamborch / Rostyk Stralessund / Lunenborch vnde Wismare / etcetera / vnde dar vmme dat gy den copmannen der dutschen hensze / dar we mede / thu behoren swarliken . beschediget vnde vor vnrechtighet hebben . / vnde de juwenA beschedigen . vnde vor vnrechtigen laten jn juwen ryken vnde gebeden / kegin priuilegia . vnde wonheyde / de van juwen vorvarenA gegheuen vnde besegilt / vnde van gik suluen bestediget / sin . ♦

Vnde we willen des alle vnde vnser eyn jowelk bisunderen / med vnsen hulperen vnse ere an gik vnde den juwen . thu guden tyden wol vorwaret hebben . ♦

Des thu bekentnisse . is vnser stad cleyn jngesegil dat secrete gedrucket op dussen bref / ♦

Geuen na der bort Cristi / verteynhundirt jar / darna in dem seuenvndetwintigesten jare / des mydwekens / . neist na Oculi mei etcetera / jn der vasten ♦