Preposito Eyderstedensi in ecclesia Slesvicensi.

Sacre religionis, sub qua Olavus abbas et conventus monasterii Rurisregii Cisterciensis ordinis Slesvicensis diocesis devotum exhibent domino famulatum, promeretur honestas, ut votis eorum .... annuamus.

Exhibita siquidem nobis nuper pro parte dictorum abbatis et conventus petitio continebat, quod olim Nicolaus Slesvicensis in Gheltingen et Nicolaus Ottoniensis episcopi in Yking Slesvicensis et Ottoniensis diocesium parrochiales ecclesias, postquam successive jus patronatus illarum per duces Jucie, qui tunc erant, et ad quos jus hujusmodi tunc spectabat, abbati, qui foret pro tempore dicti monasterii, et conventui predictis ad hoc, ut ecclesie ipse eidem monasterio perpetuo unirentur, pie et libere donatum fuerat, pro expensis et oneribus, que eidem monasterio incumbebant, commodius supportandis auctoritate ordinaria etiam successive perpetuo incorporarunt, quodque postmodum abbas, qui tunc erat, et conventus predicti ecclesiarum ipsarum, que tunc vacabant, in qualibet earum prius perpetuo vicario, qui illius parrochianorum animarum curam gereret ac inibi divinis deserviret, instituto, incorporationum hujusmodi vigore possessionem assecuti easdem ecclesias extunc per multos annos in eorum proprios usus possederunt, prout obtinent abbas et conventus prefati ac possident de presenti, pacifice.

Cum autem de incorporationum hujusmodi viribus hesitetur a nonnullis, ipsique Olavus abbas et conventus dubitent se et eorum successores super illis tractu temporis molestari posse, pro parte eorundem asserentium, quod cujuslibet ecclesiarum predictarum, quos earum vicarii in totum percipere et de illis ipsis abbati et conventui certam quotam satis modicam exsolvere consueverunt, 4 necnon monasterii predicti 40 mr. fructus non excedant, nobis fuit supplicatum, ut incorporationibus predictis robur apostolice confirmationis adjicere dignaremur.

Nos itaque, de premissis certam notitiam non habentes, discretioni tue mandamus, quatenus, vocatis, qui fuerint evocandi, etiam illis, qui de civitate vel diocesi Ottoniensi fuerint, super premissis auctoritate nostra te informes et, si per informationem hujusmodi ea reppereris ita esse, incorporationes predictas eadem auctoritate confirmes.

Datum Rome apud ss. Apostolos 6. kal. julii anno 10.