Unse fruntliche groisse ind wat wir liefs ind gutz vermoigen.

Eirsame wiise besondere gude vrunde.

As ir uns geschreven ind begert hait, unses raitz compane up den dach, de to Luneburgh up sondach mitfasten, as man synget in der heilger kirchen letare, neest komende verraympt is, zo schickende, durch der noitsachen wille, die gemeyne hensesteide antreffende, in urme brieve geroirt etcetera, hain wir, lieve vrunde, wale verstanden.

Ind begeiren urre eirberheit ind wissheit dar up weder zo wissen, dat uns die stede unwille ind kriech, as tusschen dem koninge van Denmarcken ind uch geleigen is, alwege van anbegynne bis her van hertzen leit is geweist ind noch is.

Ind want id uns zo desen tziiden mit swairen veeden umblangs unse stat also bewant ind geleigen is, ind sunderlingen zo uren landen wert, dat wir unse vrunde nyet wale velich da heen zo dage geschicken en kunnen, ind wir ouch nu in unser stat sere belast syn mit dem gelde upzoheyven, dat zo der sturen ind hulpen oever die hussen komen seulde, ind unse alre gnedichste herre, der roymsche koeninck, uns ouch zo synre roymschen keyserlicher croeninge beschreven hait, as ir, lieve vrunde, van desen stucken wale vernoymen moigt haven, so bidden wir ure wiisheit ind liefde fruntlich ind begerlich, nyet vur oevel zo neymen, dat wir unse vrunde dar umb nyet zo dem vurschreven dage en schicken.

Mer kunden wir uch in eynchen zemelichen sachen anders yet zo willen gesyn, dar zo syn wir fruntlich geneigt.

Got sii mit uch etcetera.

Datum feria quarta post invocavit.