Van Godes gnaden wii Alff unnde Gherd to Sleszwigk hertogen etcetera bekenne unde betuge apenbare in desseme breve vor alszweme, dat wii unde unnse erven deme fromen knapen Eggerde van der Herberge unnseme manne unnde denere umme sines truwen denstes willen, den he uns gedan hefft unde uns unnde unsen erven in tokomenden tiiden noch vortan don mach, hebben gegeven unde gund, gunnen unde geven vormiddelst crafft dusses breves twintich marck geldes jarliker renthe, de he hebben schal de gantzen tiid sines levendes in unnde uth Norgusherde van der alderersten wisesten redesten rente jarlikes daruth komende.

Unnde dusse vorscreven XX marck geldes schal Eggerde vorbenomed vornogen unnde geven Magnus Haiessone effte we tor tiid van unnser wegen voget is over Norgusherde alle jare to sunte Mertens dage, sunder jenigerleye vortogeringe argelist edder hulperede.

Alle desse vorscreven stucke lave wii Alff unnde Gherd to Sleszwig hertogen erbenomed vor uns unde vor unse erven deme vorbenomeden Eggerde stede unnde vaste to holdende in guden truwen ane argelist.

Disses to tuge unde merer bewisinge aller vorscreven stucke hebbe wii unnse ingesegel witliken hengen heten vor dessen breff de geven unde screven is na Gades bordt XIIII^c jare darna in deme XXX jare des sondages bynnen den achtedagen assumptionis Marie.