Van Gots gnaden wii Alff unde Gherd hertogen to Sleszwig etcetera bekennen unde betugen apenbar in desseme breve vor alle den jennen de ene zeen edder horen lesen, dat wii unde unse erven schuldich sint rechter witliker schult deme duchtigen knapen Hartich Reventlouwen unde sinen rechten erven XIIII^c lubesche marck penninge, alse to Lubeke unde Hamborch genge unde geve syn unde dar eyn islick gudman deme anderen vul mede don mach in deme lande to Holsten, ane hole penninge, vor welker XIIII^c lubesche marck wii schollen unde willen edder unse erven deme erbenomeden Hartich edder sinen erven to rente geven I^c lubesche marck unde XL lubesche marck penninge der vorscreven munte, de he alle jar mach opboren alle de wile he in unseme denste unse amptman is to Tunderen van der ersten unde redesten upboringe, de uns jarlikes vorvallet in unde uth deme gantzen lene to Tunderen.

Ock so hebbe wii hertoge erbenomed bevalen unde bevelen in krafft dusses breves unse slot Tunderen mit allen herden unde mit der gantzen vogedie darto behorende, also dat he uns dat vorstan schal unde vorwesen alse unse rekens voget in sodanen truwen alse wii eme beloven; unde wanner wii edder unse erven Hartige erbenomed van der vogedie setten willen, dat schole wii unde willen edder unse erven eme kundigen unde witlick don XV wekene tovoren in unseme besegelden breve, unde wanner de XV weken vorkomen sint, so schole wii unde willen edder unse erven eme edder sinen erven wol to dancke in eneme summen entrichten unde betalen, edder ock na sineme willen vornogen XIIII^c lubesche marck penninge der vorscreven munte mit der plichtigen rente, de denne na antale der tiid vordenet is, to ener tiid unde uppe ene stede in deme lande to Holsten, wor eme unde sinen erven dat behegelick is unde dar en ere gelt unentferet blive.

Wert ock dat Hartich in unseme denste unde bynnen der tiid alse he unse voget is schaden neme, de bewislick were, dat God almechtich wille vorwesen, so schole wii unde willen edder unse erven ene nicht affsetten van der vogedie, id en sy dat wii edder unse erven eme edder sinen erven den schaden uprichten unde vornogen myt deme vorscreven hovetstole unde mit der vorplichtigen vordenden rente alse vorscreven is.

Wert ock dat Hartich erbenomed unse vorscreven slot wedder sinen willen affgedrungen worde edder aff gewunnen worde, dat God almechtich gnedigen affkeren wille, so schullen wii unde willen edder unse erven eme edder sinen erven den vorscreven hovetstol mit der plichtigen vordenden rente unde mit deme bewisliken schaden wedder leggen unde vornogen umme achte weken dar na alse he uns dar umme tosecht.

Ock schal Hartich erbenomed dessen vorscreven summen alse XIIII^c lubesche marck penninge nenerleye wisz an uns edder an unsen erven vorbreken.

Alle desse vorscreven stucke lave wii Alff unde Gherd hertogen erbenomed etcetera.

Na Godes bort MCCCCXXXI dominica oculi.