Nos Petrus dei gracia archiepiscopus Lundensis Sveciæ primas et apostolice sedis legatus constare volumus universis presentibus et futuris quod lator presentis Ako Nicolai dilectus et fidelis advocatus noster in castro nostro Hamarense et terra nostra Borndeholm de omnibus et singulis nomine et ex parte ecclesie nostre Lundensis atque nostra quocunque modo et quibuscunque locis levatis et erogatis usque in hodiernum diem plenum computum et sufficiens ratiocinium nobis fecerat ita quod ipsum de circumspecto fidelitatis servicio merito commendamus et regraciamur eidem ♦

Eapropter eundem Akonem Nicolai et omnes suos heredes officiales et servitores quos ipse usque in presentem diem quittos habere voluerit de premissis levatis et erogatis omnino quittamus per presentes ad computacionis iteracionem nobis vel nostris successoribus faciendis nullatenus repetendos

In cujus quittacionis testimonium secretum nostrum presentibus est appensum

Datum in Lundis anno domini mcdxxx primo sabbato infra octavam corporis Christi :/