Vnsen vrundliken grut vnde wes wij gudes vormogen touoren.

Ersamen heren, guden vrunde.

Juwen breff, dar gy ane scriuen vnde begheren van der Holsten heren, juwer vnde der anderen stede sendeboden wegene leyde vnde velicheit, efft se van wyndes vnde wedders not wegen vnse hauene vnde depe vorsokende worden etcetera, hebbe wij wol vornomen.

Des beghere wij juwer leue wetende, dat der Holsten heren, juwe vnde der anderen stede sendeboden, de n{uo} to daghe in Nikopinge segelt syn, scholen gheleydet vnde velighet wesen vor vns vnde vor alle de yennen, de vmme vnsen willen don vnde laten scholen vnde willen, to vnde aff sunder arch.

Sijt Gode beuolen.

Screuen vnder vnser stat secret, des mydwekens vor vnser leuen Vrouwen daghe natiuitatis, anno etcetera XXXI^o.

Radmanne to Rozstoke.