Vrentlike groete und wat wii gudes vermoghen alle tiid tovoren.

Erbaren heren und sonderlinghes guden vrunde.

Wii hebben juwer vorsenighen bescheidenheit in vorledenen tiiden manichwerve gescreven, so wes wii dem heren van der Veer etcetera und den steden in Holland und Zeeland van deme openen breve, de dem selven heren gelevede ter Sluus an de coeplude van Hamborch, de daer ligghen, to seyndende, wedderscreven, off he den schaden ziinen undersaten ghedaen up al de henzestede holden wolde etcetera, und so wes he und de vorscreven stede uns daerup verantworden, daerute wii anders nicht merken en konden, men dat se ju metten anderen steden, de met deme konynghe etcetera in orloghe zitten, vor openbaer vyande heelden, welk se na der tiid wol bewiist hebben an vele goedes, dat uten schepen geberghet was, de under Hollandes ziide gebleven waren, daervan noch van deme goede men nicht vele wedder krighen en mochte, ock an vele anderen schepen, de ter Veer und in anderen plaetzen in Holland ziint angehaelt.

[.....]

Gescreven under unsen ingezegelen upten 10 dach in septembri, int jaer 31 etcetera.

Alderlude des gemenen coepmans van der Duetschen henze, nu to Brucge in Vlanderen wesende.