<Side 1>A

DesseA naschreuene breueA wert man behoff hebbende to deme dage ♦

j To deme ersten der to sate twisschen vns vnde den stedenA ♦

ij Item der stede vntseggebreue so vele alse der is ♦

iij Item des Romeschen koninges breue dar mede he den steden bot vnseme rechte bij to liggendeA ♦

iiij Item de tuchnisse dar mede wy bewijsen dat wy se to vnser hulpe mit deme vorgescreuen breue esschet hebben ♦

v Item dat jnstrumentum dat to deme Sunde maket wart der twe sint . beide to latine vnde vppe dudesch ♦

vj Item dat registrum van meister Niclawes Stockes weruen ♦

vij Item der stede protestacie dar ane se protest{ee}rden wo se deme Romeschen koninge belouen wolden ♦

viij Item dat verlop van der dedinge to Nykopinge dat de bisschop van Osele vnde de compter van Slochowe besegelden ♦

viij Item des Romeschen koninges vtsproke twisschen vnsA vnde de Holsten ♦

ix Item hertogen Rumpoldes anlates breff ♦

x Item der Holsten breff den se vns dar vpp besegelt hebben ♦

xj Item des Romeschen koninges breff dar mede he tuget dat sijn vtsproke nicht wart geschulden ♦

xij Item des Romeschen koninges opene breff dar mede he den Holsten gebot sineme vtsproke horsam to wesende ♦

xiij Item den breff dar ane de Holsten bekennen dat en Gottorp to pande steit ♦

xiiij Item den breff dar de hertoge van Sunder JutlandA de losinge an Gottorpe der crone to Dennemarke mede ouer ghifft ♦

xv Item de breff dar ane greue Alff van Holsten bekent dat em Vemeren van koning Woldemar geleent sij ♦

xvj Item dat jnstrumentum van deme vorlope to Helssingborch ♦

xvij Item dat jnstrumentum dat to Horsnesse maket wart vppe dat affscheident in deme clostere ♦

<Side 2>A

Alse n{ue} deA Holsten vnde de stede mit en ander dessen vorrameden dach hebben an genomen vnde den besueken edder besenden willen so is to vormodende dat dat so is to gan edder to gande wert dat edder de stede de Holsten willen hebben vppe deme dage edder ok dat de Holsten dar doch jegenwordich willen wesen edder ok dat se an beiden siden eren vromen dar se ane seen dat de ene side buten der andern dar nicht wesen wille \ ♦ Js id nv so dat der stede vpsate allene is dat de Holsten io mit en komen edder ere bodeschap mit en her schicken scholen so is to vormodende dat se dat hebben dar vp gedan edder don ♦ Effte id so geuelle dat se in der handelinge de dar gande wert / wurden vorluden latendeA alse se doch plegen vnde gewone sint wo se mit den Holsten so stan dat se buten se mit vns nene richtinge maken mogen vnde wi vns denne mit en dar vp to rechte scheten effte dat mit rechte moge edder schole macht hebben edder nicht dat denne de Holsten suluen edder ere rad / horen vnde seen mogen dat de stede nicht sueken edder begeren van en to scheidende id ne si dat se mit deme rechte dar to warden drongen ♦ Js id ok so dat de HolstenA suluen dit hebben vt gesticket vmmeA dat se nicht willen steden dat de stede allene mit vns to dage komen buten se so is dar ane to vormodende . dat ere werff dar werde alse hertogen Wilhelmes was . alse datA se hindern vnde beletten datA wi vnde de stede vns nicht vordragen ♦ Js id auer so dat id ererA beiden side vpsate vnde eendracht is so is dar ane to erkennende dat se bi malk andern menen to bliuende jd si edderA an der richtinge edder an deme krige vnde is dat also soA mogen wi vns vorseen dat se ere sinne dar vp gescherpet hebben wo se ere rede vnde word vppe dat schoneste mogen kleden dat se vor den anderen Hensesteden ginich gelut mogen hebben dar mede se de iegen vns mogen reissen vnde mit enA iegen vns to krige mogen bringen edder ok id schud dar vmme dat de stede jrst willen mit vns vorsueken effte se enes vruntliken middels edder enes bestandes to jaren kunnen ouer eens warden vnde kan dat denneA gan dat se sedder suluen lichte menen mit vns to dedingende vmmeA vnse sake mit den Holsten vnde mogen sich lichte dunken laten dat se de wise weten to vindende dar mede se vns vorscheiden mogen ♦

<Side 3>A

ItemA na welker wijse van dessen vorgescreuen dat id nv gande wert so is vns dochA behoff dat wij ouer vnsen dedingenA de wij mit den vorbenomeden beiden partigenA openbarA handelende werden / hebben vnse notarios vnde tugen vnde vns dat nenerleige wijs affdedingen laten vmme vele sake willen doch mach man wol vorluden laten dat id beiden delen n{ue}tte si vppe dat die schichte nicht werden anders na secht edder schreuen wen alse se gan sint to tugenA mogen wij nemen den sendebode van rades BurammerA vnde de van deme Gripeswolde ♦

Item steit vns ouer to wegende effte vns n{ue}tter si dat wi vppe deme dage de jrste rede begripen edder dat wi den anderen de irste rede laten ♦ Js id so dat wij en de laten so mogen se sachte ere sake vnde stucke so in een theen dat wij nicht so gud hebben de van een to vorscheidende alse effte wij suluen de jrste rede begrepen . ♦

Vnde hir vp alse dat affscheident latest to Wordingborch steit allermest vppe de twe artikle de her K{oe}rt Bisschop vnde her Reynold Rapesuluer vns vor legeden alse van der stede wegene effte wi se wolden liden to eneme vr{ue}ntliken dage alseA vmme to vorsuekende effte man de sake twisschen vns vnde see hangende slichten kunde to ener gewisse s{uo}ene edder ok de an en bestant muchte bringen mit eneme vpslage to jaren etcetera vnde to deme latesten effte wi ok de Holsten wolden liden dat se den suluen dach okA besueken edder besenden m{ue}chten etcetera . vnde alse wij en dar vpp vnse antworde leten seggen wo wij noch do / alse vorA alle wege / bereit weren lijk vnde recht to nemende vnde to geuende edder effte en dat rechtA to sware duchte wesen dat wij id denne vppe mogelike vr{ue}ntlikheid der wij kunden vnderwiset worden dat wij mit eren vnde reddelikheid vnde sunder vnser rikeA merkliken schaden m{ue}chten angan . vnde en dar vp vragen leten effte se gicht mechtich weren dar aff wes mit vns to begripende so antworden se vns dat se des nicht mechtich weren sunder dat m{ue}ste mit den andern steden sammentlike vorhandelt werden ♦

Vnde alse nvA desse anstande dach dar vp begreben is . wille wi denne de ijrste rede begripen so mogen wij vor en vorluden laten her Kordes vnde her Reynoldes vorgescreuen werff . worde vnde wedderword vnde dat vorgescreuene aff scheident vnde vragen en effte se nv des synnes sint vns to donde vnde vor vns to nemendeA lijk vnde recht edder mogelike vr{uo}ntschap alse dat vorgeruert is vnde in deme werue vorhandelt wart ♦

<Side 4>A

Wan id denne komende wert to der vorhandelinge so wert vnse rad den steden vragende effte se so sint her komen alse to volgende der wijse dar desse dach vp begrepen is ♦

Hir to werden se antworden edder dat se soA don edder nicht don willen . edder dat se datA wol don willen so verne alse wi des geliken mit den Holsten ok donA vnde nemen willen vnde bidden vns denne dat wi dat also willen gnedichliken tolaten ♦

Hir to mogen wi so antworden . dat wiA nicht wetenA dat wi mit en gicht anders hebben to vorhandelende wenA de saken dede hangen twisschen vns vnde se alse ere antworde to horende vppe de vrage dar vp wi den dach hebben to laten vnde vor geruert isA vnde scheten vns des to der cedelen des affscheides vorgescreuen wente wes dar van den Holsten wart geruert dat schach bi sunder vnde na der antworde darA wi vnde de vorgescreuen her K{oe}rt vnde her ReinoltA vnse rede van vnsen saken mede sloten hadden alse man dat ok an der vorgescreuen cedelen seen mach willen se nv deme also volgen alse dat begrepen is vnde dar vp wi to hope komen sint so sint wi des ok willichlike bereit vnde willen vnsA gevuechlik id si to like vnde to rechte edder to mogeliken vruntschup alse dat vor geruert is gerne laten vinden sint se auer des nicht beraden so were beter wesen dat se vns vnde den vnsen vnde sich suluen vngemakes vordragen hadden . ♦

Js id nv so dat se seggen se sitten mit den Holsten so dar an dat se buten en nene richtinge mit vns maken mogen vnde bidden dar vmme alse vor / dat wi ererA beider sake vnder geliker vorscheidinge willen vorhandelen vnde schlichten laten ♦ Hir to mogen wi so antworden wi willen dat setten mit en inA dat recht effte se na vorhalinge vnde vorlope der schichte de twisschen vns vnde se gegan sintA plichtich sint van rechtes wegeneA in sodaner mate bi to liggende den Holsten iegen vns edder nicht ♦ Js id denne so datA se van rechtes wegene plichtich sint en also bi to liggende . dat se id denne don so lange en dat gelustet ♦ Js id auer so dat se des nicht plichtich sint van rechtes wegene vnde en to synne is sich mit vns to richtende alse vorgescreuen is so sint wi des ok gutwillich vnde willen vns dor des gemeynen besten willeA gerne gevuechlikA alse vorgescreuen is dar ane laten vinden ♦

<Side 5>A

Doch is id so dat de stede mit den Holsten vormogen kunnen dat se vns dat vnse van Sunder Jutland datA vns mit rechte is to geb{ue}nden vnde se vns mit vnrechte vnde wreuele vor vntholden willen volgen laten vnde vns ouer geuen so wille wi gerne dar vp vnse ander sake mit den HolstenA mit der stede saken vnder geliker vorscheidinge vorhandelen laten . ♦

Sunder dat wi vnse sake van Sunnder Jutland vnde van Gottorpe nvA anderwerue scholden setten in dat recht dar aneA wij vormiddelst deme Romeschen koninge to deme wij vns mit den Holsten alseA to eneme ouersten richtere so belouet vorsegelt vnde vorborget hebben dat wij biA vnser koningliker warheid vnde se bij errer furstliken truwen stede vnde vnvorbroken vnde sunder alle vptoge vnde wedderrede holden scholen wes he vns vor recht wurde to edderA aff seggende vorscheiden sintA \ ♦

Des dunkt vnsA vnde menen datA id ok allesweme vnde bisunder des hilgen Romeschen rikes getruwen vnde vnderdanen billike dunken schole dat wijA sunder merklike misbedinge der Romeschen koningliken werdicheid vnde straffinge vnses koningliken wordes sodane affgerichtede sake vor nenen mynren edder andern richtere settenA edder scheten mogen vnde laten vns dar vmme vurder dunken dat man vns vnmogelik dat ansynnende is dat vns so hochlike to vorkerende stunde effte wi vnsen willen dar to geuende wurden ♦

Effte de stede denne seggen se willen dar gerne van laten vnsA an to sinnende de vorgescreuen sake to rechte to settende sunder se biddenA na deme male vns dunket dat wi mit reddelikheid se nicht to rechte setten mogen dat wi se setten willen to vr{uo}ntlikerr vorscheidinge vppe dat dit gemene vorderffA des te sachter moge gelegert warden ♦

Hir to mogen wi so antworden . wi willen nicht affslan ginige vruntlike vorscheidingeA dar ane wi vnde vnse rad erkennenA dat wi vnde vnse krone vnvorsinnet biA mogen sijn vnde wij mit eren vnde mit reddelikheid to laten mogen ♦

<Side 6>A

Item effte id so komt dat de stede willen mit vns in dat recht setten effte se plichtich sint van rechtes wegene den Holsten bi to liggende edder nicht etcetera so mogen wijA beweren dat se dat nicht mogen don to deme irsten mit desser reddelikheid se hebben sich to ewigen tidenA to vns vorbunden wedder allesweme de vns edderA vnsen rike mit vnrechte wurdeA anvallende / edder wedderstal donde vnde sich mit deme rechte nicht wolde beseggen laten sint demeA male denne datA de Holsten vns openbar wedderstal don an vnseme gewonnenen rechte vnde an landen vnde luden de se vns mit vnrechte vor vntholden vndeA dem rechte dat vns to vnde en affgewiset isA nicht willen vnder horich wesen so menen wij dat de stede schuldich sintA van rechtes wegeneA nicht allene den Holsten nicht wedder vnsA bi to liggende sunderA vns wedder se na lude vnser tosate to helpende vnde to denende alse wij se dar to vakene gemanet vnde esschet hebben vnde noch hute des dages dar to manen vnde esschen etcetera ♦

To deme andern male na deme de Romesche koning en geboden hefft mit sinen openen breuen dat se vns vnde vnseme gewunnenen rechte wedder de Holsten scholden vnde scholen bistendich wesen etcetera so menen wi dat se den Holsten nicht mogen biliggen s{uo}nderA schuldich sint vnsA bi to liggende wedder se alse vorgescreuen is vnde scheten vns des to rechte ♦

Item na deme male dat wij mit den Holsten vors{ue}enet vorliket vnde mit deme rechte vorscheiden sint vnde naA der tijd datA de sulue s{ue}ene schach vnde de vorscheidingeA gan is wij mit en edder se mit vns nenen krich hebben angeslagen edder vorwaringe gedan de io vor deme krige van rechtes wegeneA moit gescheen sunder allene stan mit en an vorvolginge vnde maningeA vnses gewonnenen rechtes so menen wij dat de stede nicht hebben to seggende mit giniger reddelikheit dat se s{ue}nder de Holsten dar wi io nenen krich mede hebben sich mit vns nicht vorliken mogen jd ne si dat en dat recht vinde dat se deme openbaren vnrechte wedder recht vnde wedder ere besegelde breue vnde geuene truwe biliggen vnde dat sterken mogen vnde scheten vns des to rechte ♦

<Side 7>A

Hir gan an vnse tospreke vnde schuldinge to den stedenA ♦

Item effte id denne dar to wert komende dat de stede buten de Holsten sich mit vns vorliken willen vnde ere saken edder to rechte edder to vruntlikheid mit vns willen setten so setten wij vnse schuldinge to en alse hir na beschreuen steit ♦

To deme jrsten alse alle vnse saken de wi mit den steden hebben vtstande stan vppe twigerleige artikle alse to dem jrsten vppe dat vorlust ererA priuilegien vnde rechticheide bynnen vnsen rikenA de wy menen dat se wedder vns na deme rechte vorbroken hebben vnde to deme anderen male vppe deme broke der to sate dar ane se sik to vns vorbunden hadden vnde vppe denA schaden den se vns mit vnrechte dan hebben den wi menen dat se vns van rechtes wegene plichtich sint vp to richtende vnde ok vppe den broke den se dan hebben an desseme vpslageA so steit vns ouer to wegende effte des behoff edder ok vor vns si dat wij den artikel van den priuilegien setten in vnse to sprake . wente schuldigen wy se vmme ere priuilegien dat se vorbroken hebben so schuldige wy se dar vmme dat se sich suluen groten schaden vnde vns groten vromen gedan hebben vnde na deme male dat dat nener schuldinge wert is so mogen wij s{ue}nder vnse vorsumenisse den artikel in vnser to sprake wol na laten vnde nemen en ere priuilegien vppe en recht so lange dat se vns dar vmme schuldigen vnde jo hebbe wi des bet to bekomende in vnser antworde wen effte wij dar affA ruerden in vnser tosprake ♦

Dit is denne vnse to sprake alse vmme den schaden dar wij se vmme schuldigen ♦

Na deme male dat se hadden vnde wisten na vtwisinge der besegelden to sate twisschen vns vnde se ene ben{ue}emedeA utgestickede veilige stede vnde tijd dar se alle jar muchten vndeA scholden ereA vnrecht effteA van vnser side gichteswat an se edder an de erenA bynnen der suluen to sate broken wereA klagen vnde vorrichtinge dar aff vntfangen alse wi mit der suluen to sate mogen bewijsen vnde se nicht bewijsen mogen dat se deme also gedan vnde ere recht dar alse se schuldich weren vnde sintA vorvolget hebben sunder sintA vnse vnde vnser rike vnde vndersatenA vyende worden boven datA wi vns beide vor vnde ok na der tijd vormiddest vnse vrunde vnde breue hebben vorboden vnde vorbeden laten to like vnde to rechte vnde hebben vns dar mede to groten overhefftigen schaden bracht etcetera so menen wij dat se schuldich sint van rechtes wege vns den schaden mit plichtigen wandeleA vp to richtende edder ok to danke dar aff to vorn{ue}egende vnde scheten vns des to rechte ♦

<Tillægsblad (mellem side 7 og 8), forside>

VnseA jrste schuldinge vnde tosprake to den steden ♦

Vnde hir vp mogen wij vnse jrste tosprake alsus setten ♦

Alse dat affscheident dat to Horsnesse dedinget vnde sloten wart vtwyset dat de vnsen vnde vnser rike jnwonres bynnen der tijd des vpslagesA segelen scholden to den steden vnde in ere hauenen vnde gebede geleidet vnde velichA vppe ere olde wonheit s{uo}nder arch so hebben sik de vnsen dar vp getrostetA vnde vorlatenA vnde alse se van st{uo}nden an / alse de vpslach vorkundiget was dar vp to den vorgescreuen steden qwemen vnde menden toA br{uo}ken erer olden wonheitA alse dat gededinget vnde sloten vnde vorkundiget was so wurden se beswaretA jegen ere olde wonheit vormiddelst de vplegginge der vnplichteliken cijse de de stedeA nv vnlangesA vndeA binnen korten jaren hebben vpgelecht alse wij dat ok vor desser tijd bijspraket vnde vns des beklaget hebben vnde menen dat se dar medeA den vorgescreuen vpslach edder vrede / edder wo man dat anders schal n{uo}emen an vns gebroken hebben . vnde des van rechtes wegene plichtich sint to entgeldende alse ener sake deA jegenA sodanen vpslach edder vredeA began isA . vnde willen dat setten mit en jn dat recht ♦

<Tillægsblad, bagside>

ItemA beholden wij vns dat wij alse vmme vnse tosprakeA vnde antworde toA verklarende vnde to richtigende dar an sprekenA edder in schriffte ouer geuen mogen soA wes vnde so vakene vns des behoff wert sunder vorsumenisse vnses rechtes ♦

ItemA nicht is to vormodende dat hir nv to desseme dage ginich recht werde affgesecht s{uo}nder de scheideslude mogen ramen enes anderen dages dat recht aff to seggende . alse se des na vtwisinge des affscheides mechtich sint / vnde dar vmme kan hir nv tor tijd nen recht edder vt sproke schulden werden ♦

Sunder dunket vns dat id vor vns sij / alse wij ok lange dar na synt bestan gewesen dat vnse sake mit den steden in dat recht kome vnde mit rechte vorscheiden werde so is vns behoiff dat desse dach so beleidet vnde sleten warde dat de scheideslude to enen anderen dach alse vmme dat recht aff to seggende vtsticken vnde n{ue}emen / vnde dat man sedder hir to der stede vnde nicht eer de dach vtgesticket vnde nuemet sij / dat so denne van den suluen scheidesluden vnde ok van vns an beiden sijden vorwissen vnde vorwilkoren laten alse des behoff wert datA dat recht io denne schal affgesproken werden wente is id so dat dat recht vor vns geit so is vnse sake des to beter gheit id auer jegen vns so moge wij dat scheden vnde scheten dat vor den keyser etcetera ♦

<Side 8>A

ItemA effte se hir to wedder also antworden alse se lichte donde warden vnde ok lichte in ere tosprake settende werden na deme male dat se nene legeliker stede edder tijdA hebben muchten wen dar se vnsen egenen persone vnde ere weddersaken jegenwordich hadden vmme er vnrecht alse den eren van den unsen gescheen was to klagende vnde ere sake to vorvolgende alse se deden ouer Erik Jeenssen van Auelsberge de enen burger van Lubeke in sinen eigenen geleide sine ossen vnde sijn gud nam vnde behelt dar en nen recht aff muchte weddervaren wo wol se dat vor vns suluen klageden unde bewiseden ♦

Hir to hebben wij also to antworden . de sulue sake alse se vor vns geklaget was so wijsede wij na vnser wonheid den anklager mit sinen weddersake vor vnsen rad alse vmme de sake edderA mit vruntlikheid edder mit deme rechte to vorscheidende alse wij bewysen mogen vnde na deme male wij anders nicht weten id ne were also gescheen vmme des willen dat dar nene klage edder vorvolginge vor vns aff gescheen is dat deme vorbenomeden anklagere rechtes edder wandels gebroken hebbe so menen wij dat se mit rechte vns dar vmme nicht hebben to schuldigende vnde scheten vns des to rechte ♦

ItemA schuldegen wij se dat se vns hebben van der hant gebracht vnse stad Sleswijk de se vppe louen vnde to truwer hant van vns hadden annamet vnde vns de nicht hebben wedder antwordet alse se schuldich weren so menen wij dat se schuldich sint van rechtes wegene vns de sulueA vnse stad noch wedder to antworden vnde vp to richtende al den schaden denA wij dar ouer nomen hebben vnde scheten vns des to rechte edder etcetera ♦

ItemA schuldegen wij se dat se jegen vns geteisset vnde angeherdet hebben de vnkristenen russenA dat se vnse vyende warden scholden alse wij mit bekantnisse der suluen russen vnde erer sendeboden betugen mogen etceteraA ♦

ItemA schuldegen wij se dat se vor desser veide to ener tijd qwemen in den OerssundA dar her Dethmar van Th{ue}ne houetman aff was vnde vorderuedenA vnde nemen vns vnse schepe vor der Landeskrone vnvntsecht vnde vnvorwardt etcetera ♦

ItemA schuldigen wij se alse vmme vnsen hoff to Bergen ♦

ItemA schuldigen wij se vmme vnse sloteA Flensborch vnde NigehuszA ♦

<Side 9>A

Dit sint ens deles de artikle des schaden dar wij de stede sammentlike vor schuldegen ♦

To deme jrstenA alse vmme den schaden den wij nemen alse wij mosten vpbreken vt vnseme legere alse wij Gottorp bestallet hadden vnde se vnse vyende wurden de wij schatten vppeA ♦

Item vmme den schaden den wij nemen alse se Fflensborch bestallet hadden vnde wunnenA den wij schatten vppeA ♦

Item vmme den schaden de wij vnde de vnsen van en vnde van den eren genomen hebben van der tijd dat se ijrst vnse vyende wurdenA an roue an brande an dotslage vndeA an beschattinge vnser vndersaten bynnen DennemarkenA to denA to den vnde to den steden ♦ bynnen Sweden to den to den vnde to den steden ♦ vnde bynnen Norwegen to den to den vnde to den steden den wij schatten bouenA ♦

Item vmme den schaden den wij vnde de vnsen genomen hebben vormiddest koste vnde teringe dar wij vnde de vnsen vormiddest desseme krige to nodiget sint den wij schattenA ♦

Item vmme den schaden den de vnsen genomen hebben vnde noch dagelikes nemen vormiddest dat se noch to watere noch to lande dor desses kriges willeA ere neringeA hebben mogen s{ue}eken vnde neringelosz hebben m{ue}eten sitten den wij schattenA ♦

ItemA alse dat affscheident was to Horsnesse an deme jare xiiij^c vnde xxxij dat vnse vnde vnser rike vndersaten in den steden vnde eren gebeden gebruken vnde neten scholden olderA wonheideA etcetera so schuldige wij de vorgescreuen stedeA vmme dat vnrecht dat se an de vnsen jegenA vns vndeA dat vorgescreuen affscheident began hebben vnde dagelikes noch began vormiddelst de vplegginge der cijse de se hebben gemaket vnde holden . dar de vnsen ane beschedigetA sint vnde werden alle dage jegen de oldenA wonheideA vnde seggen dat se dar ane broken hebben vnde breken noch dat vorgescreuen affscheident vnde wes se vns dar ane louet vnde vorbreuet hebben vnde esschen dar vor van en wes vns van rechtes wegene dar vor mach van en geboren ♦

<Side 10>A

Dit sint vnse schuldinge to den van Lubeke bi sunder ♦

To deme jrstenA schuldegen wij se vmme xx^m nobelen de se vns gelouet hebben vnde schuldich sint vor vnse koste vnde teringe de wi deden vmme eren willen etcetera ♦

Item bynnen der vruntlikenA tosate dar wij mit en vnde se mit vns ane sitten scholden vnde de vnsen ererA veilich scholden wesen so angrepen se vnse vnde vnser burgere knechte vnde wurpen se in ere torne vnde nemen en ere gud sunder ginigerleige reddelike sake dar se de mit rechte vmme hadden to schuldigende ♦

Item schuldigen wij her Hinrich Rapesuluer vnde her Dethmar van Th{ue}ne vmme ene loffte de se vns deden vor g{ue}d dat wij en to borge deden van twen schepen dede bleuen weren ♦

Item alse dat affscheident was to Horssenesse an deme jare xxxij dat vnser rike vnde also ok der stede kopman scholde bruken gevellik in des andern lande vnde gebedeA older priuilegien vnde rechticheide etcetera so schuldigen wij de vorscreuen stede vmme dat vnrecht dat se an de vnsen began hebben verandlelst (?) ♦

Vnse schuldinge to den Sundeschen ♦

Item na deme male wij der S{ue}ndeschen erffborne here sint vnde de sammende hant ouer se hebbenA vnde se vnse vyende alse vorgescreuen is geworden sint vnde vns vnde vnse rike vnde vndersaten beschediget hebben so hebben wij to beseende effte wij gicht vurder vppe se wes winnen mogen wen vppe de andern stede ♦

Dit sint de artikle dar ane de stede de tosate broken hebben ♦

To deme jrstenA dat se vns vnde vnseme rechteA nicht hebben bi gelegen na vnser esschinge vnde tosate alse se schuldich weren ♦

Item dat se den dach to KopenhauenA nicht jarlikes alse vnse tosate vtwiset nicht gesecht edderA besant hebben ♦

Item dat se vnse vnde vnser burgere knechte bynnen der tosate vnde guder veilicheit vengen vnde in ere torne wurpen vnde en ere gud nemen etcetera ♦

Item dat se de Gripeswoldeschen vmme dat se wedder God vnde recht vnde ere egene breueA nicht wolden vnse vyende warden vt der Hense vnde vt des kopmans rechticheide wijseden ♦

<Side 11>A

Dit sint der stede schuldinge jegen vns vnde vnse antworde dar en jegen ♦

ItemA schuldegen se vns dat wij vnde vnse ammmetlude en vnde eren burgeren ere priuilegien vnde rechticheide in vnsen rikenA de vnse eldern vor vnde wij na vorbreuet hebben wedder recht vaken gebroken hebben vnde wo wol se doch vaken dat vor vns vorklaget hebben so hebben se des like wol nicht mogen geneten . vnde hebben dar vnvorwynliken schaden ouer nomen den se menen dat wij en van rechtes wegene schuldich sint vp to richtende ♦

Hir vp hebben wij so to antworden . vns is vnwitlik dat wij en edder eren burgern ginige priuilegien broken hebben de wij en schuldich sint gewesen to holdende doch wan se vns datA bewijsen vnde nabringen alse en van rechtes wegene geboert vnde wij vns des mit rechte nicht geweren kunnen so sint wij de gene . de willich sint vns beseggen to latende vnde dar bi to donde alse vns geboert / sunder dat se schuldigen vnse ammetlude etcetera dar seggen wij so to . wij stan nymande to van vnsen ammetluden dat se gimande scholen verunrechtigen an priuilegien de em mit rechte boert to genetende vnde na deme male dat se dar vppe vnse ammetlude vor vns nicht vorvolget hebben alse se van rechtes wegene schuldich weren edder ok en bi vnsen schulden nenes rechtes gebroken hefft so menen wij dat se vns dar vor nicht hebben to schuldigende vnde scheten vns des to rechte ♦

Item schuldegen se vns dat wij bynnen vnser tosate vnde jegen ere priuilegien etlikenA vnsen steden hebben priuilegien geuen dar mede se vnde ere burgere sere verkurtet vnde verunrechtiget sint vnde groten schaden dar ouer nomen hebben den se menen dat wij schuldich sint en vp to richtendeA ♦

Item schuldegen se vns dat bynnen vnser tosate ere burgere vnde jnwonere van den vnsen vndeA bynnen vnsen riken vnde ok bynnen den vryen schonschen market vnde der swornen m{ue}ete swarliken vnde to velen tiden beschediget sint vnde en dat ereA mit welde genomen is vnde se in torne vndeA stocke worpen sint ♦

<Side 12>A

To deme jrstenA effte vns de stede schuldigen alse vmme sake dar aneA se menen dat van vnser wegene deA vrede an se edder an den eren gebroken sijA vnde menen edder esschen dar vmme dat man de suluen saken schuldich sij van rechtes wegene vor an aff to richtende eer wen seA plichtich sint vns vppe ginige to sprake to antworden ♦

Hir vp mogen wij alsus antworden . wij weren vns edder vppe de vnsen nicht schuldich an ginigerleige saken dar ane van vnser wegeneA edder van den vnsen vppe see na deme rechte ginich vrede vorbroken sij / vnde menen ok dat se nenen vredebreke des wij billike an deme rechte entgelden scholen vppe vns edder de vnsen nabringende werden alse en dat van rechtes wegene na to bringende geboert wente wij nymande van den vnsen giniger sake to stan de man na deme affscheide dat to Horssnesse dedinget wart van rechtes wegene alse wij menen vor vredebreke schuldich sij to deilende na deme male vns unwittelik is dat se edder gimand van den eren . sodane sake edder tosprake vor vns mit rechte gevurdert vnde vorvolget hefft edderA hebben dem edder den wij ouer ere weddersaken / rechtes geweigert hebben vnde hir vmme na demeA male de vorgescreuen stede van anbeginne desses kriges jn vnser klage stan hebben vnde stan noch hute des dagesA dar wij vakene vmme mit en to dage sint gewesen / vnde noch to desser jegenwordigen stede vmme to dage komen sint alse vmme den broke enes ewigen vnvorbrekelikenA vredes vorbundes vnde tosate dar ane se sik to vns to ewigen tiden bij eren truwen gelouet vnde vnder eren hangenden jngesegelen vorbreuet hebben . vnde nicht allene vmme dessen vorgescreuen broke sunder okA vmme den broke desses vorbenomeden vpslages edder vredes den seA an vns vnde an de vnsen began hebbenA van anbeginne des suluen vpslages alse de vnsen allerirst to en segelden vormiddelst de vplegginge ererA vnplichtliken cijse . alse wij dat in vnser irsten tosprake hebben vorluden laten . vnde na deme male wij vnde deA vnsen de genen sint dar de broke desses vorgescreuen vpslages edder vredes irst ane vorbroken isA van den steden vorgescreuenA

<Side 13>A

alseA wij dat in vnser jrsten tosprake vppe se vurderen vnde vorgescreuen is soA menen wij vnde seggen dat man schuldich sij van rechtes wegene desseA vnde andere vorgescreuenA vnse sake vnde tosprakeA dar vpp wij dessen dach beleuet vnde tolatenA vnde socht hebben aff to richtende / eer wenA ginige andere sake / effte se welke to vns hebben . wente se beide vor vnde na sik erst jegen vns vorbroken hebben vnde irstA in vnser anklage stan hebben vnde stan / vnde willen dit mit en setten in dat recht ♦

Item effte se vns schuldigen vmme den tollen to deme Kroke bynnen desser tosate etcetera so mogen wij dar alsus to seggen datA wij dessen vorgescreuen vpslach tolaten hebben in sodaner mate dat giwelike sijde schal segelen varen vnde komen alse dat de vorgescreuen dedinge vtwiset doch giwelikem dele an sineme rechte vnvorsumet / . vnde na deme male wij mit deme suluen rechte dar andere koninge vnde furstenA in eren riken / costumen vnde plichte mede setten vnde maken to bestande erer rike edder landeA ok dat sulue vnde des gelikesA mogen don so menen wij wes dar ane scheen isA datA de vorgescreuen vpslach van vnser wegene dar mede nicht sij gebroken . sunder dat id sij gheschen vnder der beholdelikheit vnses rechtes vorgescreuen ♦

ItemA schud dat to desseme dage dat vnse wedderpartyge scheideslude sik nenes anderen dages alse dat recht aff to seggende mechtigen edder vorwilkoren willen . vnde se to scheideslude koren hebben edder kesende warden vnse vigende . so mogen wij vppe see nabringen dat seA desseme dage nicht hebben vol dan alse se louet hebben / wente wij mogen seggen vnde bewijsen dat se sodane scheideslude koren hebben de vnse richtere mit rechte nicht mogen wesen alse de genen de sik mitA en jegen vns beveidet hebben ♦

<Side 14>A

Item schuldegen se vns dat ere schepe vnde burgere vnde ere gud bynnen der to sate in vnsen riken bekummert vnde rosteret sint gewesen dar se groten schaden ouer nomen hebben den se menen dat wij schuldich sint en vp to richtende ♦

Item schuldegen seA Erik Jenssen van Awelszberg vmme de ossen de he nam in sinen egenen geleide deme burgere van Lubeke dar hir vor aff geruert is vnde vort an vor den schaden den he dar ouer nam ♦

Item schuldegen se her Axel Peterssen alse vmme de schepe de he nam dede van Bergen qwemen etcetera ♦

To dessen vorgescreuen vijff artiklen vnde vurder to allen artiklen dede scheen sint bynnen der to saten vnde vor der veide antworden wij also . na den male dat se wisten vnde hadden enen ben{ue}emeden vtgestickeden veiligenA dach vnde stede dar se na lude vnser to sate ere vnrecht effte en wes van vnser side gescheen were edder schegeA jarlikes klagen vnde vorrichtinge dar aff vntfangen scholden vnde den dach vnde stede also nicht besocht vnde ere klage vnde recht dar nicht voruolget hebben alse se schuldich weren vnde sint so menen wij dat se vns dar affA van rechtes wegene nene schuldinge hebben to to leggende vnde willen vns des an rechte beseggen laten doch alse en wol witlik is so hebben wijA wan se to andern tiden vnde steden sik beklagedenA dar wij na vnser to sate en nichtA plichtich weren to antwordende vns alle wege so bewijset an eren saken vnde klagen alse wij vterlikest mochten vnde hebben se dar ane gevueget mit alleme vlite so dat wi menen dat se vns billike dar ane mit rechte nicht to beklagende hebben . alse to deme jrsten an des b{ue}rgers sake van Lubeke mit den ossen liker wijs alse hir vor dar aff ger{ue}ert is ♦

Item mit der besettinge ererA schepe vnde des vor bodes des se sich beklagen dat doch nicht en schach en to vnwillen edder to wreuele s{uo}nder dor anvalles willeA vnser twedracht mit den HolstenA ♦

<Side 15>A

ItemA schuldegen se vns dat ere kopman toA Bergen bouen dat wij em gelouet vnde vorsegelt scholden hebben dat he vorA vnsA vnde vor denA vnsen velich scholde wesen . en halff jar na der tijd dat wij eme wurden toA schriuende bynnen sodaner veilicheid vnde vnvorwart beschediget wart welken schaden seA menen dat wij em schuldich sint van rechtes wegene vp to richtende etcetera ♦

Hir to mogen wij so antwordenA . ♦

Item sch{ue}ldegen se vns dat wij wedder alle rechte vnde jegen ere priuilegien vpgelecht hebben to deme Kroke enen vnplichtigen nygen tollen vppe enen vrigen openen strom den mit rechte nymand macht hefft to beswarende edder to vntfrigende mit ginigerleige tollen edder vngelde dar se menen dat se vnde ere kopman sere ane verunrechtiget vnde vorweldiget werden vnde menen dar vmme dat wij schuldich sint den aff to leggende etcetera ♦

Hir to antworde wij also . wes andere koninge edder mynre furstenA vormogen dor eres erer rike landeA vromen orbars edder bestandes wille bynnen eren gebieden vp to settende dat vormoge wij io so wol binnen vnsen riken vnde gebieden vnde menen dar vmme dat seA vns dat io so vnbillike hebbenA to werende edder to vorkerende alse se dat vorkeren edder weren anderen koningen heren vnde fursten in eren gebiedenA dat se vpleggen vnde vpgelecht hebbenA vppe allesweme . doch wan se dat vormogen kunnen mit andern koningen heren vnde fursten dat se ere tollen vnde cost{ue}men in eren landen affleggenA so willen wij vns ok gerne also dar ane bewijsen dat de klage nicht allene vp vns schal bestande bliuen ♦

<Side 16>A

Effte se denne seggen den tollen den wij hebben vpgelecht to deme Kroke den hebben wij vpgelecht jegen ere priuilegien deA vnse elderenA vor vnde wij na enA vorsegelt vnde vorbreuet hebben vnde menen dar vmme dat wij mit nynerleige rechte edder hulperede den tollen dar vpleggen mogen s{uo}nder schuldich sint den wedder aff to leggende etcetera ♦

Hir to mogen wij so antworden de priuilegien de se erworuen by vnses ouergrotevaders koning Woldemars tiden . wo en de vorsegelt vnde geuen wordenA vnde wo wij en ok van rechtes wegene de schuldich sint gewesen to holdende dat steit noch wol to erkennende doch wo deme sij / hebben se van vnsen eldernA edder van vnsA ginige priuilegien edder rechticheide gehad so menen wij doch na deme male dat se vns nicht geholden s{uo}nder in velen stucken gebroken hebben de to sate de se vns bi eren tr{ue}wen gelouet hadden ewichlike to holden alse wij dat bewijsen mogen vnde dar ouer vnse vyende worden sint vnde wedder God vnde rechtA mit roue vnde brande vns vnde vnse rike socht vnde ouervallen hebben dat seA na vnsemeA vnde na alleme rechte . sodane priuilegien vnde rechticheide de enA edder van vnsen eldern edder van vns edder van gimand andersA vorlenet edder geuen sint gewesen vorbrokenA vnde nummer dar vp to sakende hebben vnde scheten vns des to rechte . etcetera ♦

ItemA de artikle dar ane de stede de tosate broken hebben stan hir vor ger{uo}ert to deme teikeneA ♦

Item effte se denne seggen alse van der andern Hensestede wegene dat en vnbillik dünket dat de andern Hensestede des vngelden scholden dar wij allene deA vire vmme schuldigen ♦

Hir to mogen wij also antworden dat de suluen vire stede vmme des gemenen kopmans wille van der Hense vnse vyende worden sint alse dat bewijslik is dat se de ganssen Hense gerne mit vns to openenA krige brengen wolden vnde alse dat ok openbar is / wes desse vorgescreuen vir stede don vnde laten van der Hense wegene dat des de andern volgen m{ue}eten alse doch de Sundeschen schriuen dat de gemenen Hensestede mit vnd anA dessenA krige stan so is ok mogelik wes desse vire hir ane vorlesen dat des de anderen mede vntgelden ♦

<Side 17>A

Dit is ene antworde dar mede wij alle tosprakeA dar de stede vns mede schuldigen mogen van sakenA dar vmme se vnse vyende worden sint / mede dempen vnde losen mogen ♦

Na deme male dat de stedeA hadden vnde wisten ene belegene ben{ue}emedeA veilige stede vnde dach dar se alle jare ere vnrecht effte en van vnser side lichte wes gescheen were klagen vnde ere recht sueken scholden alse wij bewijsen mogen . vnde se nicht bewijsen kunnen dat se dat also geholden vnde gedan hebben sunder hebben affgeslagen vnde vorsmat lijk vnde recht vns to donde vnde van vns to nemende alse wij bewijsen mogen dat wij en beide vor vnde ok bynnen deme krige vaken hebben geboden vnde beden laten vnde hebben sich suluen mit vnrechte an vns gerichtet so menen wij dat se an allen den saken dar vmme se vnse vyende worden sint van ereme rechte effte se lichte noch wes to vns edder to den vnsen hadden vorvallen sint vnde wij van rechtes wegeneA nicht schuldich sint en dar v{ue}rder vp to antworden vnde scheten vns des to rechte ♦

Effte dat nv gevalt dat wij vns mit den stedenA edder mit deme rechte edder mit vr{uo}ntlikheid to eneme ende nicht vergan kunnen vnde se vns ansynnende werden dat wij mit en maken enen vpslach to sekern jaren etcetera vnde se hir en bynnen m{ue}chten varen vnde komen vppe ere olden priuilegien so steit vns ouer to wegende wo wij en ene limpelike antworde hir vppe geuen de so reddelike l{ue}de wen man se hoert alse se sich lichte dunken laten dat id reddelike ludet dat se vns hir vpp ansynnende sint . wente scholen se de anderen Hensestede mitA en iegen vns to krige reissen so schinet dit de artikel wesen dar se dat mede van stede mogen bringen vnde hir vmme wan se vns angesynnende werden dat wijA den vpslach alse vorschreuen is mit en maken willen so mogen wij en so antworden vppe dat de sake desses gemenen swaren vorderues bi vns nicht gev{ue}nden . warde vnde wij der gemenen cristenheid alse er des nv behoff is vromen don vnde willen bewisen mogen so willen wy gerne vnse saken de wij mit en vnde se mit vns vtstande hebben setten to scheidesheren de wij an beiden siden dar to kesende werden de vns edder mit deme

<Side 18>A

rechte edder mit vrundschap na vnser beider dele willeA vorscheiden vnde willen dar vp mit enA van stunden angan ene stede vaste s{ue}ene doch so dat en giwelik deel des andersA lande edder gebede nicht s{ue}cke so lange dat wij alse vorgescreuen is volkomelike sint vorscheiden . wente enen vpslach to makende vpp sekere jare dat is vns nicht so beqweme na deme male dat wijA mit den vnsen vns nv to krige vnde to deme alse vns dar to behoff is gichte swar gesatet vnde gerichtetA hebben dar wij bynnen der tijd des vpslages sachte muchten wedder vt komen dat vns denne hir na effte id wedder to krige qweme to groten schaden muchte komen alse en giwelik mach erkennen doch effteA se io nene stede s{ue}ene mit vns willen angan vppe dat man denne nicht vppe vns to seggende hebbe dat wij meer anseen vnde wegen vnsen egenen wen den gemenen vromen vnde schadenA . so wille wijA den vpslach nicht affseggen sunder willen denA noch to laten doch so dat de ene sijde de andere nicht sueke alse vorschreuen is . edder ok datA se sichA vnderlanges s{uo}eken vppeA gnade vnde tolatinge alse wij gunnet hebben edder gunnen vnsen vr{ue}ndenA de vnse rike bynnen desseme krige socht vnde ere henteringe dar hadt hebben dochA so dat giwelik side der andernA liues vnde g{ue}des velich si wente vppe ginigerleige priuilegien se varen vnde komen to latende vor der tijd dat wij dar ouer mit en vorscheiden sintA dat steit vns nicht to donde an ginigerleige wijsA alse dat to erkennende steit an velen st{ue}cken vnde bijsunder dar ane wente wij menen dat se de priuilegie de se in vnsen riken hadt hebben na deme rechte wedder vns vorbroken hebben vnde holden dat vor een der swarsten articulen de de twisschen vns vnde enA hangen ♦

Item vppe dat vns de stede lichte schuldigende werden vmme stucke de de scheen mogen wesen bynnen desseme vpslage etcetera dar to moge wij so antworden hebben de vnsen gichte swar began darA de stede menen dat van vnser wegene desseA vpslach mede schal gebreken wesen dar wij vns doch nicht an schuldich weren so vorste wij vns dat lichte etlike dat mogen gedan hebben vppeA de vorklaringe deA wij deden to Horsnesse vppe dat affscheident dat vnse reden mit den steden dar suluest gemaket hadden dar wij vns also ane vorwarden vnde spreken dar ouer lutA vorA openbare schriuen vnde tuge weret so datA vns de stede nicht holden wes dar sloten was so scholden se weten dat wij wolden vnvorbijnden wesen en gichteswat to holdende vnde alle deme dat dar dedinget was ♦

<Side 19>A

Dit wert vnse vorhandelinge mit den Holsten ♦

Na deme male dat wij de Holsten mede to dage stedet hebben so werden wij mit en to worden komende . js id denne so dat wij also anheuen vnde laten se bidden dat se noch volAdon dor des gemenen besten wille der hilgen cristenheid vnde maniges vnschuldigen menschen wille vnde vorlaten vns vnde sich suluen vngemakes . vnde geuen vns ouerA vnse slot Gottorp mit andern vnsenA steden vnde slotenA in S{ue}nder J{ue}tland de se vns mit vnrechte vor vntholden alse de Romesche koning vns datA mit deme rechte to vnde en affgewijset hefft ♦

Hir to werden se lichte so antworden . se menenA dat vns sodane recht nicht si to edder en affgewijset des se mit rechte schuldich sint to vntgeldende edder de vorbenomeden slote vnde stede vns dar vpA ouer to geuende vnde willen dat mit vnsA setten alse se sich vortides ok dar to erboden hebben to erkenninge liker scheideslude de wij an beiden siden dar to kesende werden ♦

Hir to mogen wij so antworden wij hebben de sake eens mit en gesat in dat recht to erkenninge des Romeschen koninges vnde hebben vns mit en belouet to eme alse to eneme ouersten richtere wij bi vnsen koningliker warheit vnde se bij eren furstliken truwen . wes vns de vorbenomede Romesche koningA vor recht w{uo}rdeA aff edder to seggende in der sakeA dat wij vns dar ane scholde gen{ue}egen laten an beiden sijden vnde dat vnvorbrekelike s{ue}nder alle wedder rede vnde vptoge holden alse dat bewijslik is . vnde alse wij nv bewijsen mogen dat de vorgescreuen sakeA vns is to vnde en affgedeilet . so is pr{ue}euende dat vnser nene van beiden delen mit giniger reddelikheit macht hefft se vurder to tende to gimandes erkenninge vmme twigerleige sake wille . ♦ De erste is vmme vnser egenen beloffte wille alseA vorgeruert is wente wij sunder straffinge vnser koningliken warheid vnde de Holsten ererA furstliken truwen nene wedderrede edder vptoge dar an hebben mogen ♦ De andere sake is . wenteA sodane scheideslude edder richtere de mit rechte edder mit reddelikheid de vorgescreuenA affgerichtede sake erkennen muchten de stan nicht to bekomende / ok vmme twiger leige sake wille ♦ De erste is wente nenes richters affgesprokene ordel hefft gimand toA erkennende edder

<Side 20>A

nedderA to slande wen sin hogere richter darA he vnder schicket is in der suluen achte vnde alse nv desse vorgescreuen sake gansse werltlik is vnde in der suluen achte de Romesche koning nenen hogeren richter bouen sich hefft wente to em sichA endet de leste vtgank alles werltliken rechtes soA is ok nymand to welkes erkenninge man desse vorgescreuen sake mit rechte edder mit reddelikheitA sunder merkelike misbedinge der Romeschen koninglikenA werdicheid setten moge ♦ De andere sake is wente al were dat so dat man des Romeschen keisers edder koninges affgesprokene ordel an werltliken saken schelden muchte so m{uo}chte man dat doch mit rechte to nemande schelden wen toA deme negesten anstanden gemenen concilium der hilgen kerke wenteA dar alle recht van rechtes wegene sich endet welke scheldinge doch scheen m{uo}ste binnen x dagen na demeA alse dat ordel dat man schelden wolde affgesproken were dat doch de Holsten nicht bewijsen kunnen dat se edderA de eren also gedan hebben vnde dat se noch bewijsen m{ue}chten dat se dat gedan hadden so were dat doch machtelosz . wente wan se sich dar to beropen hadden dat hadden seA gedan alse to eneme hogeren gerichte . n{ue} mogen wij bewijsen mit vnser beider beloffte vnde wilkoer dat wij vnse vorgescreuen sake gesatt hebben to deme Romeschen koninge alse toA eneme ouersten richtere dar mede vtgesloten sint beide de pawes vnde dat conicilium / wente bouen deme ouersten nemand hogerA kan wesen vnde vmme desserA vorbenomeden saken wille soA ansynnen vns de Holsten vnbillike dat wij to gimandes erkenningeA vnse gewunnene recht vurder setten scholden sunder wij begeren vnde bidden alse vor vnde ermanen se bi eren furstliken truwen dat se vns holden dat se vns gelouet vnde vorbreuet vnde vorborget hebben vnde dat vnser beider wilkorde richter vns hefft to gewiset vnde gev{ue}nden wente se mit rechte dar nicht hebben wedder to sprekende vnde scheten vns des to vnser beider besegelden breuen vnde beloffte ♦

<Side 21>A

Item effte vns denne de Holsten vor leggen dessen wech vnde bidden dat wij se begnaden willen mit Sunderj{ue}tland to desser twiger bruedere line vnde belenent se dar mede so lange vnde nicht lengerA se willen vns darA van denen etcetera vnde vorwaringe dar vor don mit eren eden vnde breuen dat jd wedder na ererA beider dot schal vry komen to der krone idA ne gevellt dat ere eruen dat mit der suluen gnade na en beholden muchten vnde dat wijA wedder to leggen to Sunderj{ue}tlande vor Haderssleff vnde Flensborch A vnde B etcetera / vnde willen vns vorborgen vnde vorwaringe don mit den stedenA effte dat jummermeer schege dat der rike ginich edder ere vndersaten van den Holsten edder van gimand anders bynnen deme lande to Holsten edder dar vth soA lange se an der beleninge seten beschediget wurden wedder recht dat bewijslik were dat se den schaden scholen vprichten bynnen ses weken dar naA wij deme rade to Lubeke dat mit vnsen breuen edder bodeschap verk{ue}ndiget hebben vnde wo dat nicht en schegeA so scholde na deme dage de beleninge dot wesenA vnde de Holsten scholden vns ouergeuenA Sunder Jutland vnde wes se dar bynnen hadden van der crone to Dennemarken vnde wo se dat denne nicht en deden edder ok effte ere eruen na ererA beider dode vns dat nicht wolden volgen laten sunder vns mit wreuele vor vntholden dat denneA alle de HensestedeA bynnen dren manten dar na alse wij deme rade van Lubeke dat vork{ue}ndiget hebben vnsA helpen vnde to denste komen scholen vppe seA mit eneme getalle van iij^mA wol vtgerichtede vnde verdige werhafftigen in sulker wijse vnde alse dat in der tosate darA wij met en vnde se mit vns ane stan klarliker begrepen is / edder scholen vns alle jare so lange wijA edder vnse nakomelinge met den Holsten vmme de vorgescreuen sake krigende wurden geuen vor den denst den se vns don scholdenA lodige mark suluers kolnescher wichte vnde de kore dar aff scholde stan to vns edder to vnsen nakomelingen ♦

Hir to mogen wijA also antworden etcetera ♦