Van sunte Bartolomei dage erst tokomende vort over vere wekeneA hebben de erwerdige in Gode vader, here Cristern, biscop to Riipen, de erbaren unde strengen, her Erik Nigelsson, her Merten Jonsson, her Hinrik Kanutesson, her Eler Ronnowe, riddere, Peter Lucke, Yesse Erikesson unde Godschalk Andersson, knapen, redere des heren koninges Erikes van Denemarken, Sweden unde Norwegen etcetera, van des sulven heren koninges wegene, den sendeboden der stede alse: van Lubeke hern Hinrike Rapesulvere, hern Johann Beren, hern Johann Colman, mester Pawele Oldemborge; van Hamborch hern Erike van Tzeven, hern Hermann Kreygemberge; van Luneborch hern Frederike Hogeherten, hern Johann Springintgude, unde van der Wismer hern PeterA Wilden, de nu to dage weren to Horsnisse, eynen vrede gesecht sunder arech to der heren behoff van Holsten.

Unde desgelikes hebben de sulven sendeboden der stede erbenomet wedderumme, van der heren wegene van Holsten, den erbenomeden rederen des heren koninges Erikes ergenomet, to des sulven heren koninges Erikes behoff eyner vrede gesecht sunder arech, van sunte Bartolomei dage erst tokomende vort over vere wekene.

Des to witlicheyd sintA desser scrifte twe, eyne ute der anderen gesneden, van eynem lude, der eyne hebben de erbenomeden des heren koninges Erikes redere, unde de anderen de vorscreven sendeboden der stede, de gescreven sint na Godes bord verteynhundert jare unde darna an dem twe unde druttigestenA jare, uppe sunte Bartolomei avende des werden apostels.