Unsen otmodigen vlitigen denst mit begeringe alles guden.

Irluchtigen vorsten, leven gnedegen holden heren.

Wii begeren juwen gnaden weten, dat twisschen juwen gnaden, den steden unde demeA heren koninge enes vruntliken upslages unde vredes vorramet is to viiff jaren, alse der stede sendeboden unde wii juwen gnaden wol underrichtende werden, alse wi ersten by juwe gnade komen.

Dar ok de sulven sendeboden juwe gnade demodichliken umme bidden, dat gi by der hand wesen jegen de tiid, dat se wedder to hus riden, wente se mit juwen gnaden to wervende hebben, dar jw an beyden siiden merkliken ane to donde ys, unde ok denken juwe gnade toA underrichtende, in wat mateA unde wiise de vrede ghedegedinget is.

Unde, leven heren, de vrede wart belevet, vullentogen unde vorkundeget in sunte Bartholomei avende, dar juwe gnade mach up verseen wesen mit juwen kosten, ok denken wii up dessen sulven dach van hiir to ridende, wente to Wedele.

Unde wii hadden, leven heren, to menneger tiid gerne bodeschop ghehat by juwen gnaden, men wii hadden des in warheit nene mate, de van uns to sendende, wente de Denen erer nene wiis wolden riden laten, hemeliken ofte opembar etcetera.

Screven in sunte Bartolomei avende, under Henneken Dozenroden ingesegel.

Sendeboden to Horsnisze to dage vorgaddert.