Van Godes gnaden wii Alff hertog to Sleszwig etcetera bekennen unde betugen apenbar in desseme breve vor alszweme, dat wii mit vryeme willen unnde wolberademe mode vor uns unnde unse erven der erbaren frouwen Hilborch van der Eeck wedewen Roleffes van der Eeck vorlaten hebben unnde noch vorlaten in crafft dusses breves XX lubesche marck jarliker rente liffgedinges uthe den wissesten renten, de wii jarlikes hebben bii unseme rade to Sleszwigh, der se der tiid uth eres levendes bruken schal unnde mach; welcker XX marck rente wii edder unse erven der vorscreven frouwen Hilborge bynnen Hamburg in heren Hermens husz van Buren edder in ener anderen sekeren stede dar sulves er behechlick alle jare in den achtedagen unser leven frouwen to lichtmissen under unsen eghenen kosten senden unde schicken scholen de wile se levet.

Wan over de vorscreven frouwe Hilborch van dodes wegen vorkomen is, so scholen de vorscreven XX marck renthe to uns unnde unnsen erven wedderkomen unnde an uns unnde unnse erven vorfallen wesen, sunder jenigerley inholdent edder weddersprake der vorscreven frouwen edder erer erven gestlick edde werlick.

Des to tuge unde witlicheyt hebbe wii Alff vorbenomed unse ingesegel henget laten nedden an dessen breff.

Na Godes bordt XIIII^c jare dar na in deme XXXIII jare des vridages vor sunte Laurentius dage des werden mertelers.