Omnibus presens scriptum cernentibus vel audientibus Johannes van Essen civis Lubicensis salutem in domino ♦

Recognosco me per presentes reverendissimo in Christo patri ac domino domino Petro dei gracia archiepiscopo Lundensi Suecie primati et apostolice sedis legato curiam meam unacum domo lapidea Haffnis in parochia beate virginis juxta forum ad orientem sitam cum structuris et omnibus attinenciis vendidisse ac ad manus libere tradidisse perpetuo possidendam pro pleno precio per ipsum michi sufficienter soluto ♦

Itaque reddo plenarie et omnimode me contentum ♦

Quam quidem curiam pater meus Ffredericus van Essen post mortem sororis sue Elsebe Sworte Claues civis Hafnensis pie memorie jure hereditario acquisivit ♦

Unde obligo me et heredes meos ad appropriandum liberandum et disbrigandum prefato domino archiepiscopo ac suis successoribus in ecclesia Lundensi prefatam curiam pro et ab impetione quorumcunque ♦

In cujus rei testimonium sigillum meum unacum sigillis circumspectorum virorum videlicet Johannis Petri consulis Arnoldi et Lamberti aurifabrorum necnon Johannis van Staden pistoris civium Lundensium presentibus est appensum ♦

Datum Lundis anno domini mcdxxxtercio crastino beati Kalixti pape et martiris ♦