Wij Erik, van Godes gnaden der rike Denmarken, Sweden, Norwegen, der Wende, der Gothen koning vnde hertuch to Pomeren.

Bekennen vnde betughen openbare an desseme breue vor allesweme, dat wij na vnser erliken redere rade vnde volborde den erwerdigen vnde hochgebornen fursten vnde heren, geystliken vnde werliken, vnde allen anderen erbaren luden, de mit der stede Lubeke, Hamborch, Luneborch vnde Wismer sendeboden komende werden to deme vruntliken rechtdage, den wij mit den erbenomeden steden vnde se mit vns holdende werden to Werdingborch an Zelande vppe dat fest der hilligen Dreualdicheit, dat nw is, gegeuen hebben vnde gheuen in crafft desses iegenwardigen breues vnse sekere vaste geleyde vnde vulle velicheit to water vnde lande wedder vnde vort mit eren deneren, hauen vnde guderen vppe der reyse vtwart vnde vppe dem vorscreuenen dage, de wile de waret, dar to wesende vnde wedder van dar ouertosegelende en islik in sin beholt, vor vns vnde alle de yennen, de vmme vnsen, vnser rike vnde vnser rike inwoner willen don vnde laten willen vnde scholen, sunder alle arch vnde geuerde.

Were ok dat se wedder edder wint vorsloghe edder vorsettede, dat se samentliken effte etlike van en anderswor vnder edder vppe vnse land effte in andere vnse hauene quemen vppe der vorscreuenen reyse to edder aff, darsulues scolen se sunder arch to vnde aff in ere beholt in guder velicheit vnde vnsern sekeren geleide ok gentzliken sin vorwaret vor vns vnde de vnsen, also vorscreuen is.

Were ouer dat de vorbenomeden heren vnde fursten mit den eren, vnde de sendeboden der stede mit den eren van notsake wegen vppe den stekedach der hilligen Dreualdicheit vorscreuen nicht komen en konden, dat en schal en in den vorgerorden leide vnde velicheit nergen ane to hinder edder voruanghe wezen.

Villet ok, dat de vorscreuenen fursten vnde heren vnde de eren vnde de sendeboden der stede mit den eren vppe der vtreyse vnde wedderreise wor anders in vnser hauene welke quemen, dar se vt ouer land van not wegen behoff hadden to komende to Werdingborch, dar scholen en de vnsen to vorderlik sin vnde behulpen wesen mit perden vnde mit wagenen vmme reddelich lon, alse sik dat gebort.

Hirvmme vorbede wij alle de vnsen gemenliken vnde enen iewelken besundergen, hirin yenigerleie mate tegen to donde bij vnser hulde vnde koningliker wrake, men dat alle man se vorderen mit den besten in aller mate, alse vorscreuen steit.

In tuchnisse der warheit vnde orkunde desses vnses geleides hebbe wij koning Erik erbenomed vnse secret ingesegele heten hengen vor dessen breff, de gegeuen vnde screuen is to Kopenhauen, des mandages na Trinitatis, anno Domini MCDXXX quarto.