Honorabilibus ac circumspectis viris, dominis nunciis consularibus communium civitatum hanze Theutonice, de presenti ad placita concregatis, et presertim dominis proconsulibus et consulibus Lubicensibus, dominis et amicis nostris sincerissime dilectis.

Vrentlike groete und wat wy gudes vermoghen alle tiid tevoren.

Erbaren heren und sonderlinghes guden vrende.

Juwer groten vorsenighen beschedenheit geleyve to wetene, dat boven alle de poente van gebreke, de de erbaren heren radesseyndeboden in dem jare 25 hiir in dem lande vervolgheden, so hevet de coepman doch daerna alle jaer umme nye gebreke, de van tiiden to tiiden up- qwemen, vele vervolghes gehat.

Und nademe, erbaren heren, dat int jar 26 upter dachvart, de bynnen Lubeke was gehalden, waert overeengedreghen und gesloten, alse dat des coepmans seyndeboden inbrachten, dat de coepman hiir in deme lande solde sick met den Vlamynghen to den besten verdreghen dat he konde, und dat men uptes coepmans zake vorder vorsenicheit solde hebben etc., und wowol dat wy met aller nyecheit und overlast, de deme coepmanne wert ghedaen, alduslanghe hebben geleden, so is doch van jw, erbaren heren, grotliken van noeden, vorsenicheit te hebbene up de zake, de hiir nagescreven staen.

Wy hebben den veir leeden manichwerve geclaghet, woe de here van der Veer dem coepmanne groten overlast und schaden doet, boven dat de gemenen stede van der henze und wii met eme nicht utstende en hedden, und de ut Holland und Zeeland und ziine undersaten verkeerden dagelicx in den vorscreven steden und weren daer wal untfanghen, und he leghe hiir to Vlessinghen vor deme Zwene, daer he seyn mochte alle schepe uut und in zeghelen und doen wes eme geleyvede, want he hedde up deme Vlamisschen strome twee schepe ghenomen und ock ander schepe, und daer were nu to der Veer van weders und wyndes noden schipher Herman Screen met eenen hulke ingekomen.

Und nademe dat zee na dat inholden van unsen privilegien mosten de vorscreven twee schepe upten VlamisschenA strome ghenomen betalen, dat zee dan also vele by eren heren deme hertoghe van Bourgonyen etc. deden, dat de vorscreven here van der Veer de vorscreven schepe met deme goede weddergheve und betaelde, nademe dat gii heren met eme ghene vyantscap utstaende en hedden, ock ju nicht untseghet en hedde etc.

Also dat de veir leede also vele by des heren hertoghen cancelliir hadden ghedaen, dat de vorscreven here van der Veer qwam upten 15 dach van dessir maend to Ghend, des de vorscreven veer leede hadden met deme heren van Zandhuus, governiir van Holland und Zeeland, und met deme heren van der Veer vele handelinghe van unsen zaken vorscreven vor deme cancelliir, daer zee ere claghe tomale groot wedderup vortstelleden, wo groten schaden er undersaten hedden in Oestland ghenomen. Also dat vor dem heren cancelliir in den zaken nicht en waert gesloten, des de van Brucge und van den vriien deghedingeden tusschen den vorscreven heren und uns und hedden gherne dat beste ghedaen.

Doch de vorscreven here van der Veer en wolde met alle nicht van den vorscreven scepen noch goede weddergheven, ock de sake tusschen ju heren und eme in gheen ander bestand to brenghende, dan wert sake, dat gii hiir scriven wolden, tusschen desser tiid und Petri ad vinculaA, dat gii juwe vulmechtighen up enighe stede, de men daerto kesen solde, hebben wolden, umme vrentlike daghe met en to holdende, zee willen dan gheerne vrentlicheit versoeken und geleyde gheven, alse men dat verramen sal, und alle zake zullen opene stande blyven, also wes he ghenomen hevet unde hiirentusschen, daer God vor zii, noch ghenemen kan, dat he dat wil bet to dem vorscreven dage behalden, und en werden dan in vrentlicheit alle zake nicht beziiden gelecht, so wil he dan daerumme vor deme heren, dem hertoghen vorscreven, of vor weme he schuldich is, to rechte staen, off he de vorscreven schepe und gudere icht met rechte behalden moghe.

Aldus, erbaren heren, so heelt he de 6 stede, de met deme heren konynghe in veede hebben geseten, und de undersaten der heren van Holsten, vor openbaer vyande, men eist sake, dat he enich ander goed nemet, alse he gedaen hevet, dat in de vorscreven stede unde land nicht to huus en behoert, dat beheelt he boven alle de certificacien, de eme daervan gekomen ziint, und wil, dat de guden lude uter Marke van Brandenborch, den dat guet tobehoert, zullen selven komen und er gued vriien.

Hiirumme, erbaren heren, so is wol grotliken van noeden, dat de schepe, de van der Elve und anders waer herwert zeghelen, also verwaert werden, dat zee unbeschadighet blyven, nademe dat de selve here van der Veer in willen is, scepe uuttoreydende.

Und so wes ju heren geleyven sal met dem daghe, den de veir leede, also vorscreven steit, upghenomen hebben to verscrivende, des beghere wii antworde wedder van juwer erbaren vorsenighen beschedenheit, de welke unse leyve Here God moete bewaren to langhen zelighen tiiden.

Gescreven under unsen ingezegelen, upten 25 dach in junio, anno 34 etc.

Alderlude des gemenen coepmans van der Duetschen henze, nu to Brucge in Vlandren wesende.