Wii Alff van Gots gnadenA hertog to Sleszwig etcetera entbeden alle den jennen de dessen breff seen edder horen lesen ewigen heell an Gade, unde wii bekennen unde betugen apenbar in desseme breve, dat wii den erliken heren dem dompraveste deme archidyaken deme sanckmester den domheren deme capittell unde den personen der kercken to Sleszwigk alle ere vryheyt unde gnade unde privilegia, de se hebben van den konyngen to Dennemargken unde van den hertogen to Sleszwick unde den greven to Holsten unsen vorelderen, gestediget hebben unde stedigen mit crafft dusses breves, unde laten en de vrig unde unbeworen, unde hebben se unde ere lansten unde all ere gesinde unde undersaten genomen unde nemen under unsen vrede unde an unser sundergen bescherminge; unde laten vrig en unbeworen over al ere lansten unde undersaten unde over all ere gudt, dat se nu hebben allerleye broke alsze XL marck broke edder ander broke, de dar baven edder benedden sint.

Unde wes se anders vorbreken in deme hertogrike to Sleszwiigk unde in deme rike to Dennemargken, dar de herschopp recht to hefft, dat scholen se nemande vor antworden mer deme prawest unde deme capittel; unde den scholen se alleyne underdanich syn ane in hals unde in handt, dar schole wii unde unse amptlude richten, men ere gudt unde geldt, dat se vorbreken in de herschopp, dat schal vallen in dat capittel.

Unde willen dat alle ere lansten undersaten unde gesinde scholen vrig unde uth genomen wesen van allerleye unrecht beswaringe unses rechtes beyde an steden unde an dorpen.

Vortmer scholen de vorscreven doemheren unde ere papheyt bynnen Sleszwig uns unse husfrouwen Margareten unde unse erven nemen unde hebben in ereme bede, unde scolen ock unsen vader unde unse moder unse broder unde unse suster vorstorven unde alle unse vorolderen unde erven heren unde frouwen des landes to Holsten alle jar to ewigen tiden twie an jewelkeme jare herliken began in deme kore erer kercken mit vigilien unde selemissen, vor erer aller sele truweliken to biddende in aller wise eft der doden lichname jegenwardich weren.

Hiir hebben mede bii an unde over gewesen unse leven truwen radtgever alse de erwerdige in God vader unde her her Nicolaus bisschopp der kercken to Sleszwig, her Hinrick Rixstorpp ritter, Hans Pogwisch knape, unde meer loffwerdiger bedderver lude.

Des to tuge unde groter witlicheyt alle desser vorscreven stucke, so hebben wii hertog Alff erbenomed unse ingesegel hengen laten an dessen breff de gegeven unde gescreven is to Gottorpp na Gades bortA XIIII^c jar dar na in deme XXXV jar des sonavendes vor invocavit.