Deme Erwerdegen heren hern Pauwel van Rostorff / hoemester duschens ordens sinem leuen gunstigen heren mit werdicheit detur litera ♦

Minen vnuordroten steden denst / mit behegelicheit alles gudes vnde heiles to allen tiden vorscreuen ♦

Gnedege leue here ♦

Juwer hogen Erwardicheit Sende ik bij Juweme Erbaren kompthure vnde wolduchtigen hern hern Henrich Rowerdere / here Boe Steinssones soen / mynen gebornen øem vnde vrunt Swen Boesson genomet / to enem jungen vnde denere vmme ůorůaringe vnde vorsukinge willigen / vromeder lande / Erbarer lude / vnde guder zede Biddende juwe gnade denstliken mit gantzem vlijte des to nener vngunst to entfande / dat ik Juwer Erbarcheit vnde gnaden sodanne vngelerden vnde misgeberenden intogelingh ouer sende ♦

Ok gnedege leue here Juwer Erwardicheit hadde ik gerne vnde mit willen vnser lande tidinghe mit mynem eygen geschreuen des ik noch to desser tijd warhaftigen doen nicht enkonde men sodanne tidinge also do weren na uthgifte desses breues hebbe ik gebeden mynen leuen broder hern Henrich Rowerdere den kompthure van deme Oldenhus Juwer gnaden de vterliken vnde muntliken to berichtende wan he to Juwer leue komende wert wente dij eme eyn grot deil kunt vnde apenbar sint ♦

Got almechtich beware Juwe Erwardicheit gesunt vnde wolmechtich to langen tiden vnde wes ik juwer gnaden vnde den Orden to willen vnde to denste wezen scal vnde kan / des erbijde ik dach vnde nacht my vnde de mynen vnuordroten to wezende bereit ♦

Gescreuen to Kopenhauen des dinxstdages to paschen anno xxxv etcetera ♦

Hans Kropelin vaget to dem Holme ♦

Juwer gnaden willige dener ♦