In Gades nahmen amen.

Tho eren unde werdicheit der hilligen menen christenheit, tho nutte unde bestandigcheit der hilligen kercken tho Camin, der herschop tho Pameren, des capittels der suluen kercken, erer beider mannen, steden, landen, lüden, inwaner unde untersaten, unde tho guden ewigen endrachtt der erbenömeden landen und herschoppen, so iss gedegedinget, unde tho eneme ende geschlaten tuschen dem irlüchteden, hochgebaren fürsten unde heren heren Bugslaff, tho Stettin, der Pameren, der Cassuben, der Wende hertoch unde forste tho Rugen, sinen eruen unde nakömelingen up de ene side, unde den erwerdigen in Gott vader unde heren Sifride bisschoppe, heren Wedege von Rammin dekene, meister Arndt Ronnbowe, sanckmeister, mester Werner Griper, archidiacon tho Pasewalcke, her Jasper von Eicksteden, decken van Sunte Otten tho Stettin, Rutgerus Brinck, Johannes Blanckenborch, unde deme ganzen capittele der kercken tho Camin, des stichtes mannen unde steden, landen unde lüden unde undersaten, ehren nakomelingen unde eruen up de andere side, na der uthwisinge der entweyspracke unde underrichtung de vorhen gedegedinget unde gehandelt sin van dem allerirlüchtesten fürsten unde heren, heren Erike der rike Dennemarcken, Schweden, Norwegen, der Wende unde der Gotten, konigck unde hertoge tho Pomeren unde der herschop Rede, tho den tiden tho Nigen Stargarde vorgaddert unde gesammelt, also daner wise, alse hir naschreuen iss.

[.....]

Tho groterer tüchnisse unde mehrer bewaringe alle disse vorschreuene stücke truwelicke tho holdende, so hebben wy Bugslaff van Gades gnaden tho Stettin, der Pomern, der Cassuben, der Wende hertoch, unde forste tho Rügen, unse grote ingesegel mit aller unser medelauere ingesegelen mit willen unde wolberadenen mode an dissen bref lathen hengen, de screuen unde geuen iss tho Colberge, na Gades borth virthein hundert jahr darna an den sess unde druttegesten jahre, in deme dage Philippi und Jacobi der hilligen apostele.