Exponitur pro parte Henekini Hemmingi presbiteri Vibergensis diocesis, quod olim consulatus et Christi fideles opidi in Aleborgh dicte diocesis, provide considerantes, quod nec in dicto opido nec etiam in partibus vicinis hospitalia pro pauperibus ac miserabilibus personis colligendis constructa erant, et propterea pauperes et persone predicti gravibus miseriis et incommoditatibus ac necessitatibus afficiebantur, pro illorum refocillatione de consilio et licentia ordinarii ac capitanei ibidem Erici regis Dacie quoddam hospitale in honorem et sub vocabulo s. Spiritus necnon b. Marie ac ss. Johannis Evangeliste, Martini et Lucie cum Christi fidelium, qui etiam adjutrices ad hoc porrexerunt manus, presidio cum domibus et locis pro receptatione pauperum et personarum predictorum et aliis commoditatibus aptatum construi fecerunt, in quo etiam ad presens diversi pauperes eoA confluentes recipiuntur et secundum ipsius hospitalis facultates pie et humaniter tractantur ita, quod multorum erga dictum hospitale fidelium devotio ferventius et amplius continuo excitatur, premissorum omnium ordinaria auctoritate confirmationibus subsecutis.

Ut igitur prefatum hospitale ad dei laudem et gloriam necnon pauperum et personarum predictorum consolationem et refugium copiosius incrementum suscipiat, necnon persone illius regimini preessentes ritibus et habitu decentibus utantur, supplicat igitur dictus Henekinus, qui unius ex primevis dicti hospitalis fundatoribus filius et propterea ad s. v. destinatus est, quatinus fundationem constructionem confirmationem predictas ac quecunque inde secuta ex certa scientia confirmare, quodque rectores dicti hospitalis pro tempore existentes ac illi, qui ad serviendum inibi venerint utriusque sexus, ritui ac habitui rectoris hospitalis s. Spiritus Lubicensis necnon aliorum inibi viventium et famulantium se conformare et ad instar illorum vestimentorum incedere necnon in prefato hospitali sive cimiterio ibidem dece<de>ntium corpora ecclesiastice sepulture tradi possintA, concedere dignemini.

Concessum in presentia pape.

C. Ariminensis.

Item, ut pauperes ad dictum hospitale confluentes eo humanius et melius tractari valeant, ac prefatum hospitale citius in suis structuris perfici necnon decentius conservari possit, supplicat prefatus Henekinus, quatinus omnibus Christi fidelibus ad prefatum hospitale confluentibus sive illius ecclesiam, que de licentia ordinarii cum cimiterio consecrata est, visitantibus et ad perfectionem ac conservationem hujusmodi vel ipsorum pauperum et personarum subventionem adjutrices manus porrigentibus seu alias pias elemosinas inibi erogantibus septem annorum et totidem quadragenarum indulgentias, que tractu temporis non expirent, concedere dignemini.

Concessum in forma in presentia pape.

C. Ariminensis.

Datum Bononie 6. id. maji anno 7.