Sacrosancta generalis synodus Basiliensis in spiritu sancto legitime congregata universalem ecclesiam representans preposito et conventui monasterii Vibergensis ordinis canonicorum regularium s. Augustini.

Cum a nobis petitur, quod justum est et honestum, tam vigor equitatis quam ordo exigit rationis, ut id per sollicitudinem officii nostri ad debitum perducatur effectum.

Eapropter, vestris justis postulationibus grato occurrentes assensu, omnes libertates et immunitates de Romanis pontificibus sive per privilegia seu alias indulgentias vobis ac monasterio vestro concessas necnon libertates et exemptiones secularium exactionum a regibus et principibus et aliis Christi fidelibus vobis et monasterio vestro predicto indultas, sicut ea juste et pacifice obtinetis, vobis et per vos eidem monasterio auctoritate universalis ecclesie confirmamus, non obstantibus in premissis quibuscunque constitutionibus apostolicis contra privilegia et ordinationes dicti ordinis quomodolibet concessis, per quas regularis observantia dicti monasterii in aliquo censeri possit suppressa vel extincta.

Datum Basilee 12 kal. junii.