Universis sancte matris ecclesie filiis Cristiernus dei et apostolice sedis gracia episcopus Ripensis salutem et continuam in domino caritatem ♦

Gratum deo servicium impendere opinamur quociens mentes fidelium ad devocionem et pia opera facienda excitamus ♦

Cupiens igitur ut monasterium sanctimonialium beate Agnetis virginis infra civitatem Roskildensem congruis habeatur reverencia et honore omnibus et singulis vere confessis et contritis qui missas et alia divina obsequia inibi audierint / necnon qui ambitum dicti monasterii orando pro defunctis circumierint et tempore serotine pulsacionis flexis genibus salutacionem angelicam devote dixerint / verum eciam qui ornamenta sive legata sepedicto monasterio pro sui conservacione et divini cultus augmento donaverint et donari procuraverint seu quovis alio modo sibi manus porrexerint adjutrices quociens premissa et aliquod premissorum devote impleverint tociens de omnipotentis dei misericordia et apostolorum ejus Petri et Pauli auctoritate confisi accedente ad hoc consensu episcopi dyocesani xl^a dierum indulgencias de injunctis eis penitenciis misericorditer in domino relaxamus ♦

Datum anno domini m^o cdxxxvii^o sabbato divine trinitatis nostro sub secreto presentibus appenso etcetera ♦