Wij borgermeistere vnde ratmanne der stat Lubeke bekennen vnd bet{ue}gen openbare an dessem vnsem besegelden breue / alse wij van dem h{oe}chgebornen vorsten vnde heren / hern Al{ue}e / hertogen to Sleswick / greuen to Holsten . Stormeren vnde to Schouwenborch / vnsem gunstigen leuen heren / vmme vnser borgere menen n{ue}tticheit willen / to vns hebben gekofft dat land Vemeren / mit deme slote Glambeke / vnde mit allen desuluen landes . vnde slotes tobehoringen / na jnneholde des kopbreues darup gegheuen / ♦

So bekenne wij borgermeistere vnde radmanne . vor vns vnde vor vnse nakomelinge wan de erbenomede h{oe}chgeborne furste hert{oe}ge Alff / edder syne eruen na teyn jaren erst{ue}olgende / dem rade to Lubeke vorkundigen de losinge des landes Vemeren vnde des slotes Glambeke mit eren tobehoringen vnde de betalinge dar na bynnen rechten tijden don / na vtwisinghe des vorgerorden kopbre{ue}es / so schole wij vnde willen vnde vnse nakomelinge van der stat Lubeke wegen / land vnde slott mit eren tobehoringen / dem vorscreuenen heren hertogen Al{ue}e vnde synen eruen / sunder alle weddersprake wedder antworden / dar nyner behelpinge ane tonetende vns vnde vnser stat to vromen / vnde der herschop to schaden / vorder wen de rechte kop breff jnne hefft / ♦

Desses to merer witlicheit hebbe wij vor vns vnde vor vnse nakomelinge van vnser stat Lubeke wegene / dersuluen vnser stat secrete jngesegel gehenget anA dessem breue / de gegheuen vnde scre{ue}en is / na der bord Cristi verteynhundert jar vnde darna in deme souenvndedruttigesten jareA des midwekens na sunte Mertens dage des hilgen bisschoppes \ ♦